കാബൂള്‍: പുതുവര്‍ഷം ആഘോഷിക്കുന്നതിനിടെ അഫ്ഗാന്‍ തലസ്ഥാനമായ കാബൂളില്‍ ചാവേര്‍ സ്‌ഫോടനത്തില്‍ 29 പേര്‍ കൊല്ലപ്പെട്ടു. 52 പേര്‍ക്ക് പരുക്കേറ്റു.
കാബൂളിലെ സര്‍വകലാശാലക്കും കാര്‍ട്ടെ ആരാധനാലയത്തിനും സമീപത്തായി ചാവേര്‍ പൊട്ടിത്തെറിക്കുകയായിരുന്നു.
പ്രാചീന പേര്‍ഷ്യന്‍ പുതുവത്സരമായ നൗറുസ് ആഘോഷിക്കാനെത്തിയവര്‍ക്കിടയിലാണ് സ്‌ഫോടനമുണ്ടായത്. മരിച്ചവരില്‍ ഭൂരിഭാഗവും ശീഈ വിഭാഗക്കാരാണ്.ആക്രമണത്തിന്റെ ഉത്തരവാദിത്വം ഇസ്‌ലാമിക് സ്റ്റേറ്റ് ഏറ്റെടുത്തു. ആരാധനാലയത്തിലേക്ക് നടന്നുവന്ന ചാവേര്‍ പൊട്ടിത്തെറിക്കുകയായിരുന്നുവെന്ന് അഫ്ഗാന്‍ ആഭ്യന്തര മന്ത്രാലയ വക്താവ് മാധ്യമങ്ങളോട് പറഞ്ഞു. ആഘോഷത്തോടനുബന്ധിച്ച് നൃത്തങ്ങളിലും ഗാനങ്ങളിലും ഏര്‍പ്പെട്ടവരാണ് അപകടത്തിനിരയായവരില്‍ ഭൂരിഭാഗവും.
2016 ഒക്ടോബറില്‍ ഇവിടെ നടന്ന സ്‌ഫോടനത്തില്‍ 14 പേര്‍ കൊല്ലപ്പെട്ടിരുന്നു. 2011ല്‍ നടന്ന മറ്റൊരു സ്‌ഫോടനത്തില്‍ 59പേരും കൊല്ലപ്പെട്ടു. ജനുവരിയില്‍ കാബൂളില്‍ 100 പേരുടെ മരണത്തിനിടയാക്കിയ ആക്രമണത്തിന് ശേഷം ഇവിടെ സുരക്ഷ വര്‍ധിപ്പിക്കുമെന്ന് സര്‍ക്കാര്‍ ജനങ്ങള്‍ക്ക് ഉറപ്പുനല്‍കിയിരുന്നു. അതിനിടെയാണ് വീണ്ടും ആക്രമണമുണ്ടായിരിക്കുന്നത്.