ആലക്കോട്: മണക്കടവ് ചീക്കാട് ആദിവാസി കോളനിയില്‍ വീണ്ടും കടുവയുടെ ആക്രമണം. ഇന്നലെ പുലര്‍ച്ചെ നാലോടെ കോളനിയിലെ വളര്‍ത്തു നായയെ കടുവ ആക്രമിച്ചു. കഴിഞ്ഞ ആഴ്ച കുടുംബശ്രീ കഴിഞ്ഞു വരികയായിരുന്ന സ്ത്രീകള്‍ കുറ്റിക്കാടിനുള്ളില്‍ കടുവയെ കണ്ടതായി അധികൃതരെ അറിയിച്ചിരുന്നു. എന്നാല്‍ ആവശ്യമായ മുന്‍കരുതലുകള്‍ സ്വീകരിക്കാന്‍ വനം വകുപ്പ് അധികൃതര്‍ തയാറായിരുന്നില്ലെന്ന് നാട്ടുകാര്‍ ആരോപിച്ചു. തുടര്‍ന്നാണ് ഇന്നലെ പുലര്‍ച്ചെ കുറുവാവീട്ടില്‍ സുരേഷിന്റെ വളര്‍ത്തുനായയെ കടുവ ആക്രമിച്ചത്. സുരേഷും കുടുംബവും ബഹളം വച്ചതോടെയാണ് കടുവ     പിന്മാറിയത്. വിവരമറിഞ്ഞ് വനം വകുപ്പ് ഉദ്യോഗസ്ഥര്‍ സ്ഥലത്തെത്തി അന്വേഷണം നടത്തി. വനാതിര്‍ത്തിയായ ഇവിടെ ഏറെ ഭയത്തോടെയാണ് കോളനി നിവാസികള്‍ കഴിയുന്നത്. വൈദ്യുതി വേലിയുണ്ടെങ്കിലും അത് പ്രവര്‍ത്തിക്കാത്തതാണ് വ ന്യമൃഗങ്ങള്‍ ജനവാസ പ്രദേശത്ത് എത്താന്‍ ഇടയാക്കുന്നത്.