കോഴിക്കോട്: ലേബര്‍ സെസിന്റെ പേരില്‍ അന്യായമായി നികുതി പിരിക്കാനുള്ള നീക്കം അവസാനിപ്പിക്കണമെന്ന് കേരള ബില്‍ഡിങ് വെല്‍ഫെയര്‍ അസോസിയേഷന്‍ ജില്ലാ കണ്‍വെന്‍ഷന്‍ സര്‍ക്കാരിനോടാവശ്യപ്പെട്ടു. 30 വര്‍ഷത്തിലധികം പഴക്കമുള്ള കെട്ടിടങ്ങള്‍ക്കുപോലും യാതൊരു മാനദണ്ഡങ്ങളുമില്ലാതെ ലേബര്‍ ക്ഷേമനിധി ബോര്‍ഡ് നോട്ടീസയച്ച് ഉടമകളെ ദ്രോഹിക്കുകയാണെന്ന് യോഗം കുറ്റപ്പെടുത്തി. ഗ്രാമങ്ങളില്‍ കെട്ടിടങ്ങള്‍ക്ക് തുച്ഛമായ വാടകയാണ് ലഭിക്കുന്നത്. വാടക തര്‍ക്കങ്ങള്‍ കോടതി കയറുന്ന അവസ്ഥയില്‍ നിന്ന് കെട്ടിടഉടമകള്‍ക്ക് മോചനം ലഭിക്കണമെങ്കില്‍ പരിഷ്‌കരിച്ച കെട്ടിടവാടകബില്‍ പാസാക്കണമെന്ന് യോഗം ആവശ്യപ്പെട്ടു.
നളന്ദ ഓഡിറ്റോറിയത്തില്‍ നടന്ന കണ്‍വെന്‍ഷന്‍ സംസ്ഥാന വര്‍ക്കിങ് സെക്രട്ടറി പി.പി അലവിക്കുട്ടി മാസ്റ്റര്‍ ഉദ്ഘാടനം ചെയ്തു. ജില്ലാ പ്രസിഡന്റ് തയ്യില്‍ ഹംസഹാജി അധ്യക്ഷനായി. ജില്ല കമ്മിറ്റി ട്രഷറര്‍ പി. ചന്ദ്രന്‍ മണാശേരി, സി.ടി കുഞ്ഞോയി, അഡ്വ. ജനില്‍ ജോണ്‍, കരയത്ത് ഹമീദ് ഹാജി, മുഹമ്മദ് പുത്തൂര്‍, സുനില്‍ ജോര്‍ജ്, കുഞ്ഞിക്കണ്ണന്‍ ഉള്ളിയേരി പ്രസംഗിച്ചു. ജില്ലാ സെക്രട്ടറി പി.കെ ഫൈസല്‍ സ്വാഗതവും ടി.കെ ആസാദ് നന്ദിയും പറഞ്ഞു.