വരന്തരപ്പിള്ളി: പാലപ്പിള്ളി, കാരികുളത്ത് ഹാരിസണ്‍സ് മലയാളം ലിമിറ്റഡിന്റെ മുപ്ലി എസ്റ്റേറ്റ് ഓഫിസിനു മുന്നില്‍ അനിശ്ചിതകാല സത്യഗ്രഹ സമരം നടത്തുന്ന തൊഴിലാളികള്‍ക്കു അഭിവാദ്യങ്ങളുമായി ട്രേഡ് യൂനിയന്‍ നേതാക്കളെത്തി.
സി.ഐ.ടി.യു സംസ്ഥാന സെക്രട്ടറി എം.എം വര്‍ഗീസ്, ജില്ലാ ട്രഷറര്‍ കെ.കെ രാമചന്ദ്രന്‍, ഐ.എന്‍.ടി.യു.സി ജില്ലാ നേതാവ് ആന്റണി കുറ്റൂക്കാരന്‍, എന്‍.എം വീരാസ ആണ് തൊഴിലാളികളെ ഇന്നലെ അഭിസംബോധന ചെയ്തു സംസാരിച്ചത്. സി.ഐ.ടി.യു ജില്ലാ വൈസ് പ്രസിഡന്റ് പി.ജി വാസുദേവന്‍ നായര്‍ അധ്യക്ഷനായി. പി.ടി ജോയ്, കെ.കെ രവി സംസാരിച്ചു. ജോലിയില്‍ നിന്നും വിരമിച്ച തങ്ങള്‍ക്കു അര്‍ഹതപ്പെട്ട ഗ്രാറ്റുവിറ്റി ഉടനെ വിതരണം ചെയ്യണമെന്നു ആവശ്യപ്പെട്ടു കഴിഞ്ഞ 11 ദിവസമായി സംയുക്ത ട്രേഡ് യൂണിയന്‍ നേതൃത്വത്തില്‍ ഹാരിസണ്‍സ് മലയാളം എസ്റ്റേറ്റിലെ തൊഴിലാളികളാണു എസ്റ്റേറ്റ് ഓഫിസിനു മുന്നില്‍ സത്യഗ്രഹ സമരം നടത്തുന്നത്.