കൊടുങ്ങല്ലൂര്‍: നാല് മാസം മുന്‍പ് നന്നാക്കിയ മൊബൈല്‍ ഫോണിനെക്കുറിച്ചുള്ള തര്‍ക്കത്തെ തുടര്‍ന്ന് മൊബൈല്‍ ഷോപ്പിന് നേരെ ആക്രമണം. കടയുടമയെ മര്‍ദിച്ചു. കട അടിച്ച് തകര്‍ത്തു. സംഭവത്തില്‍ പ്രതിഷേധിച്ച് ഇന്ന് കാരയില്‍ വ്യാപാരി വ്യവസായി ഏകോപനസമിതി ഹര്‍ത്താല്‍ ആചരിക്കും.
എടവിലങ്ങ് കാര സെന്ററിലെ ബഹദൂര്‍ ഷോപ്പിങ് മാളില്‍ പ്രവര്‍ത്തിക്കുന്ന സ്റ്റോബറി മൊബൈല്‍ ആന്‍ഡ് കംപ്യൂട്ടേഴ്‌സ് എന്ന സ്ഥാപനമാണ് അടിച്ച് തകര്‍ത്തത്. കടയുടമ കാര പാണ്ടികശാലക്കല്‍ അബ്ദുള്‍ അസീസ്(48) നെ അക്രമി ക്രൂരമായി മര്‍ദിച്ചു.
ഇയാളെ താലൂക്ക് ആശുപത്രിയില്‍ പ്രവേശിപ്പിച്ചു. ഇന്നലെ വൈകീട്ട് നാല് മണിയോടെയാണ് സംഭവം. കടയില്‍ ജോലിക്കാര്‍ മാത്രമുള്ള സമയത്താണ് ഒരാള്‍ മൊബൈല്‍ ഫോണ്‍ കേടുവന്നതായി പറഞ്ഞ് കടയിലെത്തിയത്. ഇയാള്‍ കടയില്‍ ബഹളം വെച്ചപ്പോള്‍ ജീവനക്കാര്‍ വിവരം അറിയിച്ചതിനെ തുടര്‍ന്ന് കടയുടമ എത്തി ഇയാളോട് സംസാരിച്ചു. എന്നാല്‍ ക്ഷുഭിതനായ ഇയാള്‍ കടയുടമയെ കഴുത്തിന് പിടിച്ച് ഞെരിക്കുകയും, കൈ പിടിച്ച് പിരിക്കുകയും ചെയ്തു.
തുടര്‍ന്ന് ഇരുമ്പ് വടി കൊണ്ട് കട തല്ലി തകര്‍ക്കുകയായിരുന്നു. ഇതോടെ കടയുടമ പുറത്ത് ഇറങ്ങിയപ്പോള്‍ ഓടിയെത്തിയ ഇയാള്‍ വീണ്ടും മര്‍ദിക്കുകയും ചവിട്ടി താഴെയിടുകയും ചെയ്തുവെന്ന് ആശുപത്രിയില്‍ കഴിയുന്ന കടയുടമ പറഞ്ഞു. കടക്ക് വലിയതോതിലുള്ള നാശനഷ്ടങ്ങള്‍ സംഭവിച്ചിട്ടുണ്ട്. സംഭവത്തില്‍ പ്രതിഷേധിച്ച് ഇന്ന് കാരയില്‍ വ്യാപാരികള്‍ ഹര്‍ത്താല്‍ ആചരിക്കും. സംഭവത്തിന് ഉത്തരവാദികളായവരെ ഉടന്‍ അറസ്റ്റ് ചെയ്യണമെന്ന് വ്യാപാരി വ്യവസായി ഏകോപനസമിതി ജില്ലാ ജനറല്‍ സെക്രട്ടറി എന്‍.ആര്‍ വിനോദ്കുമാര്‍ ആവശ്യപ്പെട്ടു.