തളിപ്പറമ്പ്: കീഴാറ്റൂരിലെ കര്‍ഷകസമരം അവസാനിപ്പിക്കാന്‍ രമ്യമായി പരിഹാരം കാണണമെന്ന് കേരളാ മുഖ്യമന്ത്രി പിണറായി വിജയന്റെ കാലുപിടിച്ച് അപേക്ഷിക്കുകയാണെന്ന് ബി.ജെ.പി നേതാവും എം.പിയുമായ സുരേഷ് ഗോപി. കീഴാറ്റൂര്‍ ഐക്യദാര്‍ഢ്യ സമിതിയുടെ നേതൃത്വത്തില്‍ 'കേരളം കീഴാറ്റൂരിലേക്ക്'എന്ന മുദ്രാവാക്യവുമായി നടത്തിയ മാര്‍ച്ചിനു ശേഷം കീഴാറ്റൂര്‍ വയലില്‍ നടന്ന സമ്മേളനത്തില്‍ സംസാരിക്കുകയായിരുന്നു അദ്ദേഹം.
സി.പി.എം പ്രവര്‍ത്തകര്‍ സമരപ്പന്തല്‍ കത്തിച്ചത് ടി.വിയില്‍ കണ്ട കാഴ്ച്ചയാണ് എന്നെ ഈ സമരത്തെ പിന്തുണക്കാന്‍ പ്രേരിപ്പിച്ചത്. പ്രകൃതിയെ നശിപ്പിക്കാതെ റോഡ് വികസനം നടത്തുന്നതിനും നമ്മള്‍ യുദ്ധം ചെയ്യുമെന്നും ഈ വിഷയം അടുത്ത രണ്ട് ദിവസത്തിനുള്ളില്‍ പ്രധാനമന്ത്രിയേയും ശരിയായ രീതിയില്‍ ധരിപ്പിക്കുമെന്നും അദ്ദേഹം പറഞ്ഞു.
ദേശീയപാതക്ക് വേണ്ടി കേരളം മുന്നോട്ട് വെക്കുന്ന ആവശ്യങ്ങള്‍ക്ക് വേണ്ടി യുദ്ധം ചെയ്യാനും മുന്നിലുണ്ടാകുമെന്നും അദ്ദേഹം കൂട്ടിച്ചേര്‍ത്തു.