ലഖ്‌നൗ: രാജ്യസഭാ തെരഞ്ഞെടുപ്പിലുണ്ടായ തിരിച്ചടിക്കുപിന്നാലെ യു.പിയില്‍ എസ്.പിക്കും ബി.എസ്.പിക്കും കനത്ത വെല്ലുവിളിയായി ഏപ്രിലില്‍ നടക്കുന്ന 12 എം.എല്‍.സി(മെമ്പേഴ്‌സ് ഓഫ് ലജിസ്‌ലേറ്റീവ് കൗണ്‍സില്‍) തെരഞ്ഞെടുപ്പുകള്‍. മെയ് അഞ്ചിന് ഒഴിവു വരുന്ന സീറ്റുകളിലേക്ക് ഏപ്രിലില്‍ തെരഞ്ഞെടുപ്പ് നടക്കുമെന്നാണ് തെരഞ്ഞെടുപ്പ് കമ്മിഷന്‍ നല്‍കുന്ന വിവരം. അഖിലേഷ് യാദവ്, ബി.ജെ.പി നേതാക്കളായ മൊഹസിന്‍ റാസ, മഹേന്ദ്ര സിങ് അടക്കമുള്ളവരുടെ കാലാവധിയാണ് മെയ് അഞ്ചിന് സമാപിക്കുന്നത്. ഈ തെരഞ്ഞെടുപ്പുകളില്‍ ബി.ജെ.പിയെ അട്ടമറിക്കാന്‍ വീണ്ടും എസ്.പി-ബി.എസ്.പി കൂട്ടുകെട്ട് ശക്തമാക്കാനാണ് അഖിലേഷും മായാവതിയും തീരുമാനിച്ചിട്ടുള്ളത്.
ലജിസ്‌ലേറ്റീവ് കൗണ്‍സിലില്‍ വിജയിക്കണമെങ്കില്‍ ഓരോ സ്ഥാനാര്‍ഥിക്കും 33 വോട്ടുകള്‍ വേണം. സംസ്ഥാനത്ത് 324 അംഗങ്ങളുള്ളതുകൊണ്ട് ഒന്‍പത് സീറ്റുകളില്‍ ബി.ജെ.പിക്ക് എളുപ്പത്തില്‍ വിജയിക്കാനാകും. ശേഷിക്കുന്ന മൂന്ന് സീറ്റുകളിലേക്കാണ് മത്സരം നടക്കുക. ഇതാണ് എസ്.പിക്കും ബി.എസ്.പിക്കും നിര്‍ണായകമാകുക. എസ്.പിക്ക് 46 എം.എല്‍.എമാരുള്ളതുകൊണ്ട് ഒരു സീറ്റില്‍ അവര്‍ക്ക് ജയിക്കാനാകും. ശേഷിക്കുന്ന 13 വോട്ടുകള്‍ 18 എം.എല്‍.എമാരുള്ള ബി.എസ്.പിക്ക് നല്‍കണമെന്ന് മായാവതി ആവശ്യപ്പെട്ടിട്ടുണ്ട്.
തങ്ങള്‍ തമ്മിലുള്ള കൂട്ടുകെട്ട് 2019ലെ പൊതു തെരഞ്ഞെടുപ്പിലും ഉണ്ടാകണമെന്ന് മായാവതി ആവശ്യപ്പെട്ട സാഹചര്യത്തില്‍ എം.എല്‍.സി തെരഞ്ഞെടുപ്പിലും നിര്‍ണായക നീക്കം നടത്താനുള്ള ഒരുക്കം അണിയറയില്‍ അവര്‍ ശക്തമാക്കിയിട്ടുണ്ട്. എന്നാല്‍ രാജ്യസഭാ തെരഞ്ഞെടുപ്പില്‍ അമിത്ഷാ നടത്തിയ അട്ടിമറി, എം.എല്‍.സി തെരഞ്ഞെടുപ്പിലുണ്ടാകാതിരിക്കാനുള്ള തയാറെടുപ്പിലാണ് എസ്.പി-ബി.എസ്.പി നേതാക്കള്‍.