ആലപ്പുഴ: മലിനീകരണ നിയന്ത്രണ ബോര്‍ഡിന്റെ സംസ്ഥാന അവാര്‍ഡ് ആലപ്പുഴ നഗരസഭയ്ക്ക് ലഭിച്ചു. വികേന്ദ്രീകൃത മാലിന്യ സംസ്‌ക്കാരണ പരിപാടി വിജയകരമായി നടത്തിയതിനാണ് അവാര്‍ഡ്. ഒരു ലക്ഷം രൂപയും ട്രോഫിയും അടങ്ങുന്ന അവാര്‍ഡ്  അഞ്ചിന് കണ്ണൂരില്‍ നടക്കുന്ന ചടങ്ങില്‍ ആരോഗ്യമന്ത്രിയില്‍നിന്നും നഗരസഭാ ചെയര്‍മാന്‍ തോമസ് ജോസഫ് ഏറ്റുവാങ്ങും. ഇന്നലെയാണ് അവാര്‍ഡ് പ്രഖ്യാപനം നടന്നത്. ആലപ്പുഴ നഗരത്തിലെ മാലിന്യപ്രശ്‌നം പരിഹരിക്കുന്നതിന് ഭരണസമിതിക്ക് കഴിഞ്ഞതായി  പരിശോധനയ്‌ക്കെത്തിയ മലിനീകരണ നിയന്ത്രണ ബോര്‍ഡ് അധികൃതര്‍ കണ്ടെത്തിയിരുന്നു. സംസ്ഥാനത്തെ എല്ലാ നഗരസഭകളിലും നടത്തിയ പരിശോധനയില്‍ വിജയകരമായി പദ്ധതി നടപ്പാക്കിയത് ആലപ്പുഴയാണ്. യു ഡി എഫ് ഭരിക്കുന്ന നഗരസഭയില്‍ നഗരത്തിലെ മാലിന്യങ്ങള്‍ സംസ്‌ക്കരിക്കുന്നതിന് നൂതന പദ്ധതികളാണ് ആവിഷ്‌ക്കരിച്ച് നടപ്പാക്കി വരുന്നത്. ഈ അവാര്‍ഡ് നഗരസഭ ഭരണത്തിന് ലഭിക്കുന്ന അംഗീകാരമാണെന്ന് ചെയര്‍മാന്‍ തോമസ് ജോസഫ് പറഞ്ഞു.