മുംബൈ: ത്രിരാഷ്ട്ര വനിതാ ടി20 പോരാട്ടത്തില്‍ ഇന്ത്യക്ക് തുടര്‍ച്ചയായ രണ്ടാം തോല്‍വി. ഇംഗ്ലണ്ട് വനിതകള്‍ ഇന്ത്യയെ ഏഴ് വിക്കറ്റിന് തകര്‍ത്തു. ആദ്യം ബാറ്റ് ചെയ്ത ഇന്ത്യ നാല് വിക്കറ്റ് നഷ്ടത്തില്‍ 198 റണ്‍സെന്ന മികച്ച സ്‌കോര്‍ പടുത്തുയര്‍ത്തിയെങ്കിലും ഇംഗ്ലീഷ് ടീം 18.4 ഓവറില്‍ മൂന്ന് വിക്കറ്റ് മാത്രം നഷ്ടത്തില്‍ 199 റണ്‍സെടുത്താണ് വിജയം സ്വന്തമാക്കിയത്.
64 പന്തില്‍ അഞ്ച് സിക്‌സും 15 ഫോറും സഹിതം 124 റണ്‍സ് അടിച്ചെടുത്ത ഡാനിയല്‍ വ്യാറ്റിന്റെ കരിയറിലെ രണ്ടാം ടി20 സെഞ്ച്വറിയുടെ കരുത്തിലാണ് ഇംഗ്ലണ്ട് വിജയിച്ചത്.
ടോസ് നേടി ഇംഗ്ലണ്ട് ഇന്ത്യയെ ബാറ്റിങിനയക്കുകയായിരുന്നു. സ്മൃതി മന്ധന (40 പന്തില്‍ 76), മിതാലി രാജ് (53), ഹര്‍മന്‍പ്രീത് കൗര്‍ (30) എന്നിവരുടെ മികച്ച ബാറ്റിങ് ബലത്തിലാണ് ഇന്ത്യ പൊരുതാവുന്ന സ്‌കോറിലെത്തിയത്.