റായ്പൂര്‍: ഈ വര്‍ഷം നടക്കുന്ന ഛത്തിസ്ഗഡ് നിയമസഭാ തെരഞ്ഞെടുപ്പില്‍ ആരുമായും സഖ്യമുണ്ടാക്കില്ലെന്ന് മുന്‍മുഖ്യമന്ത്രിയും ജനതാ കോണ്‍ഗ്രസ് അധ്യക്ഷനുമായ അജിത് ജോഗി. നേരത്തെ കോണ്‍ഗ്രസ് നേതാവായിരുന്ന അദ്ദേഹം പാര്‍ട്ടിയില്‍ നിന്ന് രാജിവച്ചാണ് പുതിയ പാര്‍ട്ടി രൂപീകരിച്ചത്. തന്റെ പാര്‍ട്ടിക്ക് ജനങ്ങളുടെ ശക്തമായ പിന്തുണയുണ്ടെന്നും അദ്ദേഹം അവകാശപ്പെട്ടു.
തെരഞ്ഞെടുപ്പില്‍ 90 നിയമസഭാ സീറ്റുകളിലും പാര്‍ട്ടി മത്സരിക്കും. 45 ലധികം സീറ്റെങ്കിലും പിടിക്കാനാകുമെന്നാണ് പ്രതീക്ഷയെന്നും ജോഗി വ്യക്തമാക്കി. മുഖ്യമന്ത്രി രമണ്‍ സിങ്ങിന്റെ നേതൃത്വത്തിലുള്ള സര്‍ക്കാര്‍ ഇതുവരെ തെരഞ്ഞെടുപ്പ് വാഗ്ദാനങ്ങള്‍ നിറവേറ്റിയിട്ടില്ല. ഇക്കാര്യം ജനങ്ങള്‍ക്ക് ബോധ്യമായിട്ടുണ്ട്. ബി.ജെ.പിയെ നേരിടാന്‍ സംസ്ഥാനത്ത് കോണ്‍ഗ്രസിന് പ്രാപ്തിയില്ലെന്നും തന്റെ നേതൃത്വത്തിലുള്ള പാര്‍ട്ടി അധികാരത്തിലേറിയാല്‍ ജനങ്ങള്‍ക്ക് നല്‍കുന്ന വാഗ്ദാനങ്ങള്‍ പൂര്‍ണമായി നിറവേറ്റുമെന്നും അജിത് ജോഗി പറഞ്ഞു.
മുഖ്യമന്ത്രി രമണ്‍ സിങ്ങിന്റെ സിറ്റിങ് സീറ്റായ രാജ്‌നന്ദഗോണ്‍ മണ്ഡലത്തില്‍ മത്സരിച്ചേക്കുമെന്നും അദ്ദേഹം സൂചന നല്‍കി. മണ്ഡലത്തിലെ ജനങ്ങള്‍ മുഖ്യമന്ത്രിക്കെതിരായ ജനവികാരം പ്രകടിപ്പിക്കുന്നുണ്ടെന്നും അദ്ദേഹം പറഞ്ഞു.