കൊല്ലം: സീറോമലബാര്‍ സഭ എറണാകുളം-അങ്കമാലി അതിരുപതാ ഭൂമിയിടപാട് വിവാദമായതിന് പിന്നാലെ കൊല്ലത്തെ ലത്തീന്‍സഭ ഭൂമിവിവാദവും വഴിത്തിരിവില്‍. ലത്തീന്‍ കത്തോലിക്ക രൂപതയുടെ പണം ചെലവാക്കുന്നത് സംബന്ധിച്ച് കൊല്ലം ബിഷപ്പ് സ്റ്റാന്‍ലി റോമനെതിരേ കോടതിവിധി പുറപ്പെടുവിച്ചു.
സഭാ സ്വത്തുക്കള്‍ വില്‍ക്കുന്നതോ ബാധ്യതപ്പെടുന്നതോ സംബന്ധിച്ചുള്ള നയപരമായ തീരുമാനങ്ങള്‍ എടുക്കുന്നതും പുരോഹിതരെയോ സ്ഥാപനങ്ങളിലെ തൊഴിലാളികളെയോ സ്ഥലംമാറ്റുന്നതിനും എതിരെയാണ് കൊല്ലം മുന്‍സിഫ് കോടതി ഉത്തരവായത്.
എന്നാല്‍ മതപരമായ ചടങ്ങുകള്‍ നടത്തുന്നതിന് ഉത്തരവ് ബാധകമല്ല. ചര്‍ച്ച ആക്റ്റ് ആക്ഷന്‍ കൗണ്‍സില്‍ വൈസ് പ്രസിഡന്റുമാരും സഭാവിശ്വാസികളായ തങ്കച്ചന്‍, ഹിലാരി സക്കറിയ എന്നിവര്‍ അഭിഭാഷകന്‍ മുഖേനെ ഫയല്‍ ചെയ്ത കേസിലാണ് ഉത്തരവ്.
കൊല്ലം ബിഷപ്പ്, രൂപതിയിലെ വിവിധ പുരോഹിത മേധാവികള്‍, വത്തിക്കാന്റെ ഇന്ത്യന്‍ പ്രതിനിധി എന്നിവര്‍ പ്രതികളായ കേസില്‍ മൂന്നുദിവസം നീണ്ട വാദത്തിന് ശേഷമാണ് വിധി.
കാനന്‍ നിയമപ്രകാരം നിയമിതനായ ബിഷപ്പ്, നിയമം അനുശാസിക്കുന്ന 184, 401 വകുപ്പുകള്‍ പ്രകാരം 74 വയസ് പൂര്‍ത്തിയായാല്‍ തന്റെ രാജിക്കത്ത് മാര്‍പ്പാപ്പക്ക് അയക്കണമെന്നാണ് ചട്ടം. തുടര്‍ന്ന് അധികാരം ഒഴിഞ്ഞ് അടുത്തയാളിന് കൈമാറുകയും വേണം.
എന്നാല്‍ 75 വയസ്‌കഴിഞ്ഞ ബിഷപ്പ് സഭാ സ്വത്തുക്കള്‍ വില്‍പ്പന നടത്തുന്നതായും ഭരണത്തില്‍ ക്രമക്കേടു നടക്കുന്നതായും വിശ്വാസികളില്‍ ഒരുവിഭാഗം ആരോപിച്ചിരുന്നു. നിലവില്‍ സ്റ്റാന്‍ലി റോമന്‍, ബിഷപ്പ് പദവിയുടെ ചുമതലക്കാരന്‍ മാത്രമാണെന്നായിരുന്നു എതിര്‍കക്ഷികളുടെ വാദം. സ്ഥാനമൊഴിയും മുന്‍പ് തന്നിഷ്ടപ്രകാരം സ്വത്തുക്കള്‍ കൈകാര്യം ചെയ്യാനും ജീവനക്കാരെ സ്ഥലംമാറ്റാനും ബിഷപ്പ് ശ്രമിക്കുമെന്ന് ചൂണ്ടിക്കാട്ടിയാണ് ചര്‍ച്ച് ആക്റ്റ് ആക്ഷന്‍ കൗണ്‍സില്‍ കോടതിയെ സമീപിച്ചത്.