കൊച്ചി: കലൂരില്‍ വീടിന്റെ ടെറസില്‍ കഞ്ചാവ് ചെടികള്‍ വളര്‍ത്തിയ യുവതി പൊലിസ് പിടിയില്‍. കലൂര്‍ കത്രികടവ് വട്ടേക്കാട്ടു റോഡില്‍ ജോസണ്‍ വീട്ടില്‍ മേരി ആന്‍ ക്ലമന്റ്(37) ആണ് നോര്‍ത്ത് പൊലിസിന്റെ പിടിയിലായത്. ആറ് മാസം വളര്‍ച്ചയെത്തിയ ആറര അടി ഉയരമുുള്ള ചെടികളാണ് പിടിച്ചെടുത്തത്.
വീടിന്റെ മുകളില്‍ കഞ്ചാവ് ചെടികള്‍ വളര്‍ത്തുന്നു എന്ന് പൊലിസിന് കിട്ടിയ രഹസ്യ വിവരത്തിന്റെ അടിസ്ഥാനത്തില്‍ രണ്ട് ദിവസമായി നിരീക്ഷണം നടത്തിയതിന് ശേഷമാണ് ഇന്നലെ പരിശോധന നടത്തിയത്. പൊലിസിന്റെ ചോദ്യം ചെയ്യലില്‍ സുഹൃത്ത് നല്‍കിയ കഞ്ചാവ് ചെടികളെന്നാണ് മേരി മൊഴി നല്‍കിയിരിക്കുന്നത്. എന്നാല്‍, മേരിക്ക് ലഹരി ഉപയോഗിക്കുന്ന ശീലമുണ്ടായിരുന്നതായി പൊലിസിന് വിവരം ലഭിച്ചിട്ടുണ്ട്.