ചെറുതോണി: ജില്ലാ പഞ്ചായത്ത് ബജറ്റില്‍ കാര്‍ഷിക മേഖലയ്ക്കും ഭവന നിര്‍മാണത്തിനും ഊന്നല്‍. 113,60,65,824 രൂപ വരവും 113,19,56,000 രൂപ ചെലവും 41,09,824 രൂപ നീക്കിയിരിപ്പുമുള്ള ബജറ്റ് ജില്ലാ പഞ്ചായത്ത് വൈസ് പ്രസിഡന്റും ധനകാര്യ സ്ഥിരം സമിതി അധ്യക്ഷനുമായ മാത്യു ജോണ്‍ അവതരിപ്പിച്ചു.
ജില്ലാ പഞ്ചായത്ത് പ്രസിഡന്റ് കൊച്ചുത്രേസ്യാ പൗലോസ് അധ്യക്ഷത വഹിച്ചു. 2018 -19 വര്‍ഷത്തില്‍ മാലിന്യമുക്ത ജില്ല, എല്ലാവര്‍ക്കും ആരോഗ്യം, ജില്ലയുടെ സമഗ്ര വികസനം എന്നിവയും ബജറ്റ് വിഭാവനം ചെയ്യുന്നുണ്ട്. ഭവന നിര്‍മാണത്തിനു 11 കോടിയാണു നീക്കിവച്ചിരിക്കുന്നത്. മാലിന്യമുക്ത ജില്ലയ്ക്കായി മൂന്നു കോടി, ക്ഷീരവികസനത്തിനു മൂന്നു കോടി, മുട്ടക്കോഴിയും കൂടും പദ്ധതിക്ക് 1.6 കോടി രൂപയും വകയിരുത്തിയിട്ടുണ്ട്.
നെല്‍ക്കൃഷി 25 ലക്ഷം, ഒരു ഏക്കറില്‍ കൂടുതല്‍ കൃഷിയിറക്കുന്ന പാടശേഖര സമിതിക്കും സംഘങ്ങള്‍ക്കും വിത്തും സബ്‌സിഡിയും. ജൈവ പച്ചക്കറി കൃഷി സംയുക്ത പദ്ധതിക്ക് 85 ലക്ഷം, മറ്റു കാര്‍ഷിക വികസന പരിപാടികള്‍ 1.5 കോടി, കരിമ്പു കൃഷി പ്രോത്സാഹനം 10 ലക്ഷം, കാര്‍ഷിക വിപണനം വിപണന പ്രോത്സാഹനം 40 ലക്ഷം, മണ്ണ്ജല സംരക്ഷണം 50 ലക്ഷം, ചെറുകിട ജലസേചനം 50 ലക്ഷം, മുട്ടക്കോഴി വളര്‍ത്തല്‍ സംയുക്ത പദ്ധതി ഒരു കോടി, മൃഗസംരക്ഷണം 20 ലക്ഷം, കൈത്തറി ഖാദി 15 ലക്ഷം. സഹകരണ സംഘങ്ങള്‍ക്കു ധനസഹായം 10 ലക്ഷം, സൂക്ഷ്മ ജലവൈദ്യുത പദ്ധതികള്‍ 80 ലക്ഷം.
കാറ്റില്‍നിന്നു വൈദ്യുതി ഉല്‍പാദനം 25 ലക്ഷം, എസ്എസ്എ 2.75 കോടി. ജില്ലാ പഞ്ചായത്ത് വികസന വിഭാഗത്തിന്റെ 2017 -18 വര്‍ഷത്തെ ബജറ്റ് അവതരിപ്പിച്ചു. വിവിധ വാടക ഇനത്തിലുള്ള വരവും ജില്ലാ പഞ്ചായത്ത് ഭൂമി വിവിധ ആവശ്യങ്ങള്‍ക്കായി വിട്ടുനല്‍കുമ്പോള്‍ ലഭിക്കാവുന്ന വരവും മുന്‍വര്‍ഷത്തെ നീക്കിയിരിപ്പും ഉള്‍പ്പെടുത്തി 1.5 കോടി വരവും 1.44 കോടി ചെലവും 18,20,139 രൂപ നീക്കി ബാക്കിയും പ്രതീക്ഷിക്കുന്ന ബജറ്റാണ് അവതരിപ്പിച്ചത്.
ഇടുക്കി മെഡിക്കല്‍ കോളജിനു സമീപം ഷോപ്പിങ് കോംപ്ലക്‌സ് നിര്‍മിക്കുന്നതിനായി 85,00,000 രൂപ മാറ്റിവച്ചിട്ടുണ്ട്.