കാഞ്ഞങ്ങാട്: നെഹ്‌റു കോളേജില്‍ വിരമിക്കുന്ന പ്രിന്‍സിപ്പല്‍ പി.വി.പുഷ്പയ്ക്ക് ആദരാഞ്ജലി അര്‍പ്പിച്ച് പോസ്റ്റര്‍. യാത്രയയപ്പ് ചടങ്ങുകള്‍ക്കിടെയാണ്  പ്രിന്‍സിപ്പലിന് ആദരാഞ്ജലി അര്‍പ്പിച്ചുള്ള പോസ്റ്റര്‍ കാമ്പസ്സില്‍ പ്രത്യക്ഷപ്പെട്ടത്.

സംഭവത്തില്‍ പ്രിന്‍സിപ്പലും കോളജ് മാനേജ്‌മെന്റും പൊലിസില്‍ പരാതി നല്‍കിയേക്കും.  കോണ്‍ഗ്രസ് അനുഭാവിയായ പ്രിന്‍സിപ്പല്‍ കെ.എസ്.യു ഒഴികെയുള്ള വിദ്യാര്‍ഥി സംഘടനകളോട് പ്രതികൂല നിലപാടാണ് സ്വീകരിക്കുന്നതെന്ന് എസ്.എഫ്.ഐ നേരത്തെ ആരോപിച്ചിരുന്നു. ഇതു സംബന്ധിച്ച് നിരവധി പ്രശ്‌നങ്ങളും കോളജില്‍ ഉണ്ടായിട്ടുണ്ട്.

കാമ്പസിലെ പ്രശ്‌നങ്ങള്‍ക്കെല്ലാം കാരണം എസ്.എഫ്.ഐയാണെന്ന് പ്രിന്‍സിപ്പല്‍ പറയുന്നു. അറ്റന്‍ഡന്‍സ് നല്കുന്നതുമായി ബന്ധപ്പെട്ടുണ്ടായ പ്രശ്‌നമാണ് പോസ്റ്ററിലേക്ക് നയിച്ചതെന്ന് അവര്‍ ആരോപിച്ചു. വിദ്യാര്‍ഥികള്‍ക്കെതിരായ തെളിവുകള്‍ അധ്യാപകരുടെ പക്കലുണ്ടെന്നും പ്രിന്‍സിപ്പല്‍ വ്യക്തമാക്കി.