കൊല്‍ക്കത്ത: അഞ്ചുവര്‍ഷങ്ങള്‍ക്കു ശേഷം കേരളം സന്തോഷ് ട്രോഫി ഫൈനലില്‍. കരുത്തരായ മിസോറാമിനെ എതിരില്ലാത്ത ഒരു ഗോളിന് തകര്‍ത്താണ് കേരളം സന്തോഷ് ട്രോഫി ഫൈനലില്‍ പ്രവേശിച്ചത്. രണ്ടാം പകുതിയില്‍ 54ാം മിനുറ്റില്‍ വി.കെ അഫ്ദാലിന്റെ ഗോളാണ് മത്സരത്തില്‍ കേരളത്തെ വിജയികളാക്കിയത്.

ഗോള്‍ രഹിത സമനിലയുടെ ആദ്യ പകുതിക്ക് ശേഷം രണ്ടാം പകുതിയില്‍ പകരക്കാരനായിറങ്ങിയ അഫ്ദാല്‍ ആണ് കേരളത്തിന്റെ വിജയഗോള്‍ കണ്ടെത്തിയത്. നിരവധി ഗോളവസരങ്ങള്‍ മിസോറാമിന് കിട്ടിയെങ്കിലും അതൊന്നും ലക്ഷ്യം കണ്ടില്ല. കേരള ഗോളിയുടെ മികച്ച പ്രകടനം മിസോറാമിന്റെ വിജയലക്ഷ്യം തട്ടിയെടുത്തു.

ഞായറാഴ്ച നടക്കുന്ന ഫൈനലില്‍ ബംഗാളിനെയാണ് കേരളം നേരിടുക. രണ്ടാം സെമിയില്‍ കര്‍ണാടകയെ തകര്‍ത്താണ് ബംഗാള്‍ ഫൈനലിലെത്തിയത്. 14 വര്‍ഷങ്ങള്‍ക്കു മുമ്പ് 2004ലാണ് കേരളം അവസാനമായി കിരീടം നേടിയത്. അന്ന് പഞ്ചാബിനെ പരാജയപ്പെടുത്തിയാണ് കിരീടം സ്വന്തമാക്കിയത്. 12 ഫൈനല്‍ കളിച്ച കേരളം അഞ്ചു തവണ കിരീടം സ്വന്തമാക്കിയിട്ടുണ്ട്.