കളി അവസാന 20 ാം മിനുട്ടിലേക്ക്. ഗോള്‍ തിരിച്ചടിക്കാനുള്ള ശ്രമങ്ങള്‍ വിജയിക്കാതെ വന്നതോടെ മിസോറം കട്ടകലിപ്പിലായി. 81ാം മിനുട്ടില്‍ മിസോറമിന്റെ സമനില ഗോള്‍ എന്നുറപ്പിച്ച നീക്കം. കേരളത്തിന്റെ ഗോള്‍മുഖത്ത് പന്തിനായി കൂട്ടപ്പൊരിച്ചില്‍.
പല തവണ ഷോട്ടുതിര്‍ത്തിട്ടും ലക്ഷ്യം കാണുന്നില്ല. ഇതിനിടെ പന്ത് കിട്ടിയ ലാല്‍റെമാവിയ ഷോട്ടുതിര്‍ത്തു. കേരളം തലയില്‍ കൈവച്ചു പോയ നിമിഷം.
പന്ത് ഗോള്‍ ലൈന്‍ കടക്കാന്‍ അനുവദിക്കാതെ മിഥുന്‍ പിടിച്ചെടുത്തു. ഗോള്‍ കിട്ടാതെ വന്നതോടെ, വീണുപോയ ഗോളി മിഥുന്റെ മുഖത്ത് ചവിട്ടിയാണ് മിസോറം താരം ലാല്‍ റെമുവാറ്റ കലിപ്പു തീര്‍ത്തത്. ഈ ആക്രമണം കൈയാങ്കളിയുടെ വക്കിലെത്തി. മാച്ച് കമ്മിഷണര്‍ ഗോള്‍മുഖത്ത് എത്തിയാണ് കൂട്ടത്തല്ല് ഒഴിവാക്കിയത്. ലാല്‍ റെമുവാറ്റയ്ക്ക് പ്രതിഫലമായി മഞ്ഞ കാര്‍ഡും ലഭിച്ചു. മുഖത്ത് പരുക്കേറ്റ മിഥുനിന് പ്രാഥമിക ശുശ്രൂഷ നല്‍കിയ ശേഷമാണ് കളി തുടര്‍ന്നത്.
ഗോള്‍ വീഴാതെ നോക്കാന്‍ കേരളവും തിരിച്ചടിക്കാന്‍ മിസോറമും പോരാട്ടം ശക്തമാക്കിയതോടെ ഫൗളുകളും കൂടി. നിരന്തരം കേരള ഗോള്‍ മുഖത്തേക്ക് മിസോറം സമനില തേടി ഇരമ്പി കയറിയെങ്കിലും അവര്‍ക്ക് ഇന്നലെ ദുഃഖ വെള്ളി തന്നെയായി. കേരളത്തിന് ഗുഡ് ഫ്രൈഡേയും.