ഉപ്പള: ഉപ്പള മണ്ണംകുഴിയില്‍ ക്ലബിനു നേരെ അക്രമം. അക്രമത്തില്‍ ക്ലബിനകത്തുണ്ടായിരുന്ന യുവാവിനു പരുക്കേറ്റു. മണ്ണംകുഴിയിലെ ബിച്ചൂ ബോയ്‌സ് ക്ലബിനു നേരെയാണ് അക്രമമുണ്ടായത്. ഗ്ലാസും ടെലിവിഷനും ലൈറ്റുകളും തകര്‍ത്തു. ക്ലബിനകത്ത് ലുഡോ കളിച്ചുകൊണ്ടിരിക്കുകയായിരുന്ന മണ്ണംകുഴിയിലെ അന്‍സാറി(20)നാണു പരുക്കേറ്റത്.
കഴിഞ്ഞ ദിവസം രാത്രി എട്ടോടെ ഹനീഫ എന്നയാളെ അന്വേഷിച്ചെത്തിയ രണ്ടുപേരാണ് അക്രമം കാട്ടിയത്. ഹനീഫ ഇവിടെ ഇല്ലെന്ന് പറഞ്ഞപ്പോള്‍ ഗ്ലാസും ടി.വിയും ലൈറ്റും അടിച്ചുതകര്‍ക്കുകയുമായിരുന്നുവെന്നും ഹനീഫക്കെതിരേ വധഭീഷണി മുഴക്കിയാണ് സംഘം മടങ്ങിയതെന്നും പറയുന്നു. മഞ്ചേശ്വരം പൊലിസ് കേസെടുത്ത് അന്വേഷിക്കുന്നു.