കാസര്‍കോട്: പടന്നക്കാട് നെഹ്‌റു കോളജില്‍ പ്രിന്‍സിപ്പലിന് ആദരാഞ്ജലി അര്‍പ്പിച്ച സംഭവത്തില്‍ മൂന്നു എസ്.എഫ്.ഐ പ്രവര്‍ത്തകരെ കോളജില്‍ നിന്നും സസ്‌പെന്‍ഡ് ചെയ്തു. എസ്.എഫ്.ഐ.ജില്ലാ കമ്മിറ്റിയംഗം അനീസ് മുഹമ്മദ്,എം.പി.പ്രവീണ്‍,ശരത് ദാമോദര്‍ എന്നിവരെയാണ് അന്വേഷണ വിധേയമായി കോളജില്‍ നിന്നും സസ്‌പെന്‍ഡ് ചെയ്തത്. ഇവര്‍ക്കെതിരെ നടപടിയെടുക്കാന്‍ കഴിഞ്ഞ ദിവസം ചേര്‍ന്ന കോളജ് മാനേജ്‌മെന്റ് കമ്മിറ്റി യോഗം തീരുമാനിച്ചിരുന്നു.അന്വേഷണത്തില്‍ കുറ്റവാളികളെന്ന് തെളിഞ്ഞാല്‍ ഇവര്‍ക്കെതിരെ കൂടുതല്‍ നടപടിയുണ്ടാവുമെന്ന് അധികൃതര്‍ വ്യക്തമാക്കി.

കോളജില്‍ നിന്നും വിരമിക്കുന്ന പ്രിന്‍സിപ്പാള്‍ പുഷ്പജയ്ക്കു ആദരാഞ്ജലി അര്‍പ്പിച്ചു പോസ്റ്റര്‍ പതിക്കുകയും പടക്കം പൊട്ടിക്കുകയും,മധുര പലഹാര വിതരണം നടത്തുകയും ചെയ്തതിനെ സംഭവം വിവാദമായത്. സംഭവുമായി ബന്ധപ്പെട്ട വീഡിയോ ക്ലിപ്പുകള്‍ സമൂഹ മാധ്യമങ്ങളില്‍ കൂടി യഥേഷ്ടം പ്രചരിച്ചിരുന്നു.

സംഭവുമായി ബന്ധപ്പെട്ടു എസ്.എഫ്.ഐക്കെതിരെ കടുത്ത പ്രതിഷേധമാണ് ജില്ലയിലെങ്ങും  നടക്കുന്നത്. കുറ്റക്കാരായ വിദ്യാര്‍ഥികള്‍ക്കെതിരെ നടപടിയെടുക്കുമെന്ന്  വിദ്യാഭ്യാസ മന്ത്രി നേരത്തെ പറഞ്ഞിരുന്നു. അതേ സമയം സംഭവത്തില്‍ എസ്.എഫ്.ഐക്ക് ബന്ധമില്ലെന്ന് പറഞ്ഞു രംഗത്തു വന്ന നേതാക്കള്‍  വിദ്യാര്‍ഥികളെ സസ്‌പെന്‍ഡ് ചെയ്തതോടെ കടുത്ത പ്രതിരോധത്തിലായി. സംഭവത്തില്‍ കൂടുതല്‍ വിദ്യാര്‍ഥികള്‍ക്ക് ബന്ധമുണ്ടോയെന്ന കാര്യവും ഇതിനു വേണ്ടിയെടുത്ത   സമിതി അന്വേഷിക്കും.