കണ്ണൂര്‍: കാപ്പാ നിയമപ്രകാരം പ്രതിയാക്കിയ സി.പി.എം പ്രവര്‍ത്തകനെ ബംഗളൂരുവില്‍ പൊലിസ് പിടികൂടി. ചാലാട് പഞ്ചാബി റോഡിലെ മൂര്‍ക്കോത്ത് ജിതിന്‍ദാസ് എന്ന ദാസപ്പനെ(28)യാണ് ടൗണ്‍ സി.ഐ അനില്‍കുമാറും സംഘവും അറസ്റ്റുചെയ്തത്. കണ്ണൂര്‍, വളപട്ടണം പൊലിസ് സ്‌റ്റേഷനുകളിലെ വധശ്രമക്കേസ് ഉള്‍പ്പെടെ പതിനഞ്ചോളം ക്രിമിനല്‍ കേസുകളില്‍ പ്രതിയാണ് ഇയാളെന്നു പൊലിസ് പറഞ്ഞു. കഴിഞ്ഞ ജനുവരി നാലിനു ചാലാട് മണലിലെ തുള്ളംപൊയില്‍ അക്ഷയിയെ(19) വെട്ടിപ്പരുക്കേല്‍പിച്ച കേസിലാണ് അറസ്റ്റ്.
ജിതിന്‍ദാസ് ഉള്‍പ്പെടെ ആറുപ്രതികളാണ് കേസിലുള്ളത്. ഇതില്‍ അഞ്ചുപേരും പിടിയിലായി. നിതിന്‍ എന്ന പ്രതിയെയാണ് ഇനി പിടികിട്ടാനുള്ളത്. തെരഞ്ഞെടുപ്പ് ഫലപ്രഖ്യാപനത്തിനുശേഷം തളാപ്പില്‍ ആഹ്ലാദ പ്രകടനത്തിനിടെയുണ്ടായ അക്രമക്കേസിലും ജിതിന്‍ദാസ് മുഖ്യപ്രതിയാണ്.