ഒറ്റപ്പാലം: അമ്പലപ്പാറയിലേക്കുള്ള കുടിവെള്ള പദ്ധതി , ഒറ്റപ്പാലം നഗരസഭയും ജല അതോറിറ്റിയും തമ്മിലുള്ള തര്‍ക്കം ഇനിയും തീര്‍ന്നില്ല. വരാനിരിക്കുന്ന നഷ്ടപരിഹാരത്തുകയെ കുറിച്ചാണ് തര്‍ക്കം. നഗരസഭ പ്രദേശത്തിലൂടെ റോഡരികില്‍ പൈപ്പ് ഇടുന്നതിന്ന് ജല അതോറിറ്റി എസ്റ്റിമേറ്റ് പ്രകാരം 12 ലക്ഷം രൂപയാണ്.
ഈ തുക കെട്ടിവെയ്ക്കാന്‍ ജല അതോറിറ്റി തയ്യാറായപ്പോള്‍ നഗരസഭ കൗണ്‍സില്‍ തീരുമാനപ്രകാരം നഗരസഭ എഞ്ചിനീയര്‍ 49 ലക്ഷം രൂപയുടെ എസ്റ്റിമേറ്റാണ് തയ്യാറാക്കിയത്. നഗരസഭ ആവശ്യപ്പെട്ട തുക നല്‍കാന്‍ ജല അതോറിറ്റി തയ്യാറല്ലതാനും. ഈ തര്‍ക്കത്തിന് ഇതുവരെയും തീര്‍പ്പ് കല്‍പ്പിച്ചിട്ടില്ല. കിഫ് ബി യിലൂടെയാണ് അമ്പലപ്പാറയിലേക്കുള്ള കുടിവെള്ള പദ്ധതിയ്ക്ക് തുക അനുവദിച്ചിട്ടുള്ളത് .ഇതില്‍ ആദ്യ പത്തുകോടി രൂപയുടെ പ്രവൃത്തികളാണ് നടന്നു വരുന്നത്. അമ്പലപ്പാറ പഞ്ചായത്ത് പ്രദേശങ്ങളില്‍ 350 എംഎം വ്യാസമുള്ള പൈപ്പുകള്‍ സ്ഥാപിച്ചു കൊണ്ടിരിക്കുന്നു.
ഇനി സ്ഥാപിക്കാനുള്ളത് മീറ്റ്‌ന മുതല്‍ കാഞ്ഞിരക്കടവു പാലം വരെയുള്ള നഗരസഭ പ്രദേശത്താണ്. നേരത്തെ പദ്ധതി നിര്‍മ്മാണത്തിന്റെ ആരംഭഘട്ടത്തില്‍ നഗരസഭ കൗണ്‍സിലര്‍മാര്‍ പൈപ്പ് ഇറക്കുന്നതു തടഞ്ഞിരുന്നു. ഇതു സംബന്ധിച്ച ചര്‍ച്ചകളിലാണ് പൈപ്പിടുന്ന ഭാഗങ്ങളിലെ റോഡ്, വീടുകളിലേക്കുള്ള കോണ്‍ക്രീറ്റ് വഴികള്‍ വരെ പൊളിക്കുന്നത് പുന:സ്ഥാപിക്കുന്നതിനുള്ള ഫണ്ട് ജല അതോറിറ്റി നഗരസഭയില്‍ കെട്ടിയ വെക്കണമെന്ന് തീരുമാനിച്ചിരുന്നു. എന്നാല്‍ തുക അരക്കോടി യോളമായതോടെ ജല അതോറിറ്റി പറ്റില്ലെന്ന നിലപാടിലാണ്.ഇത്തരം വിവാദങ്ങള്‍ പദ്ധതി നടത്തിപ്പിന്ന് കാലതാമസം നേരിടുമെന്നതില്‍ ആശങ്കയിലാണ് നാട്ടുകാര്‍.ഇതു സംബന്ധിച്ചു പി ഉണ്ണി എം എല്‍ എ ജല അതോറിറ്റി അധികൃതരുയുമായുള്ള ചര്‍ച്ച നാളെ നടക്കും.