ജിദ്ദ: ഉംറ നിര്‍വഹിക്കാനെത്തിയ ഈജിപ്ഷ്യന്‍ വയോധിക മയക്കുമരുന്നുകേസില്‍ അറസ്റ്റിലായ സംഭവത്തില്‍ പ്രധാനപ്രതി പിടിയില്‍. ദഖാലിയ ഇന്‍വെസ്റ്റിഗേഷന്‍ ടീമാണ് അബ്ദുല്ല മുഹമ്മദ് അബ്ദുല്ല അല്‍മുന്‍സലാവി എന്നയാളെ പിടികൂടിയത്. ഗിസാ ഗവര്‍ണറേറ്റിലെ ഫൈസല്‍ ഏരിയയില്‍ ഒളിവില്‍ താമസിക്കുകയായിരുന്നു ഇയാള്‍.
സി.സി ടിവി ദൃശ്യങ്ങളാണ് പ്രതിയെ പിടികൂടുന്നതില്‍ നിര്‍ണായകമായത്. കുറ്റകൃത്യത്തിന് സഹായിച്ച സ്ത്രീയും ഭര്‍ത്താവും നേരത്തെ അറസ്റ്റിലായിരുന്നു. ത്വല്‍ഖാ കോടതി രണ്ടുപേരെയും 15 ദിവസത്തേക്ക് റിമാന്‍ഡ് ചെയ്തിരുന്നു.
മയക്കുമരുന്നുകളുമായി സഅ്ദിയ അബ്ദുസ്സലാം എന്ന വയോധിക തായിഫ് വിമാനത്താവളത്തില്‍ അറസ്റ്റിലായത് ഈജിപ്തില്‍ വന്‍ കോലാഹലം സൃഷ്ടിച്ചിരുന്നു. സൗജന്യമായി ഉംറ നിര്‍വഹിക്കാമെന്ന വാഗ്ദാനത്തില്‍ മയങ്ങി ഇവരുടെ കെണിയില്‍പ്പെട്ടാണ് 75കാരി കുടുങ്ങിയത്. ഉംറ നിര്‍വഹിക്കാന്‍ സഊദി വ്യവസായിയാണ് സൗകര്യം ഏര്‍പ്പെടുത്തുന്നതെന്നും ഇയാളുടെ ഭാര്യക്ക് നല്‍കാന്‍ ആണെന്ന് പറഞ്ഞ് വസ്ത്രത്തില്‍ പൊതിഞ്ഞ രീതിയില്‍ മയക്കുമരുന്നുകള്‍ നല്‍കുകയുമായിരുന്നു. എന്നാല്‍ മാതാവ് സഊദിയില്‍ കുടുങ്ങിയ വിവരം അറിഞ്ഞപ്പോള്‍ തന്നെ മകള്‍ ഹുദാ ഇക്കാര്യം സുരക്ഷാവിഭാഗത്തിന് രേഖാമൂലം ബോധിപ്പിച്ചിരുന്നു.
വയോധികരായ തീര്‍ഥാടകരെ ഉപയോഗപ്പെടുത്തി സഊദിയിലേക്ക് മയക്കുമരുന്ന് കടത്തുന്നതിന് തയാറാക്കിയ കുടിലപദ്ധതിയാണ് സഅ്ദിയ അറസ്റ്റിലായതോടെ പൊളിഞ്ഞത്.
സൗജന്യ ഉംറ നിര്‍വഹിക്കുന്നതിനായി 10 വയോധികരെ തിരഞ്ഞെടുത്തിരുന്നതായി ഒന്നാംപ്രതി പൊലിസിനോട് സമ്മതിച്ചു. ഇവരുടെ മോചനത്തിനായി സഊദി അധികൃതരുമായി ചര്‍ച്ച നടത്തിവരുന്നതായി ഈജ്പ്ഷ്യന്‍ സുരക്ഷാ വിഭാഗം അറിയിച്ചു.