കണ്ണൂര്‍: 'സമാധാനം, വികസനം' എന്ന മുദ്രാവാക്യമുയര്‍ത്തി സി.പി.എം ജില്ലാകമ്മിറ്റി സംഘടിപ്പിക്കുന്ന പ്രചാരണ ജാഥകള്‍ തുടങ്ങി. കെ.കെ രാഗേഷ് എം.പി നയിക്കുന്ന വടക്കന്‍ മേഖലാ ജാഥ കണ്ണൂര്‍ സിറ്റിയില്‍ ജില്ലാ സെക്രട്ടറി പി. ജയരാജനും ജയിംസ് മാത്യു എം.എല്‍.എ നയിക്കുന്ന തെക്കന്‍ മേഖലാ ജാഥ എടയന്നൂര്‍ തെരൂര്‍ പാലയോട് പി.കെ ശ്രീമതി എം.പിയും ഉദ്ഘാടനം ചെയ്തു.
കണ്ണൂര്‍, പാപ്പിനിശ്ശേരി, മാടായി, പയ്യന്നൂര്‍, പെരിങ്ങോം, ആലക്കോട്, ശ്രീകണ്ഠപുരം, മയ്യില്‍, തളിപ്പറമ്പ് ഏരിയകളിലാണു വടക്കന്‍ മേഖലാ ജാഥ പര്യടനം നടത്തുക. ഒന്‍പതിനു വൈകിട്ട് തളിപ്പറമ്പില്‍ സമാപിക്കും. കണ്ണൂര്‍ സിറ്റിയില്‍ നടന്ന ചടങ്ങില്‍ വയക്കാടി ബാലകൃഷ്ണന്‍ അധ്യക്ഷനായി. എം. പ്രകാശന്‍, കെ.പി സുധാകരന്‍ സംസാരിച്ചു. ജാഥ ഇന്നു കുഞ്ഞിപ്പള്ളിയില്‍നിന്ന് തുടങ്ങി മാട്ടൂലില്‍ സമാപിക്കും. തെക്കന്‍ ജാഥ മട്ടന്നൂര്‍, ഇരിട്ടി, പേരാവൂര്‍, കൂത്തുപറമ്പ്, പാനൂര്‍, തലശേരി, പിണറായി, അഞ്ചരക്കണ്ടി, എടക്കാട് ഏരിയകളിലാണു പര്യടനം നടത്തുക. ഒന്‍പതിനു വൈകിട്ട് എടക്കാട് സമാപിക്കും. ഉദ്ഘാടനചടങ്ങില്‍ എന്‍.വി ചന്ദ്രബാബു അധ്യക്ഷനായി. ടി. കൃഷ്ണന്‍, എം. രതീഷ് സംസാരിച്ചു. എടയന്നൂര്‍ കേന്ദ്രീകരിച്ച് ചുവപ്പുവളണ്ടിയര്‍ മാര്‍ച്ചും നടന്നു. ജാഥ ഇന്നു കൂടാളിയില്‍നിന്ന് ആരംഭിച്ച് വള്ളിത്തോട് സമാപിക്കും.