പാല : ചക്കാമ്പുഴ- ഇടക്കോലി- ഉഴവൂര്‍ റോഡുകള്‍ ഇനി സ്മാര്‍ട്ട് റോഡുകളുടെ പട്ടികയിലേക്ക്. പാലാ - ഉഴവൂര്‍, പാലാ -രാമപുരം റോഡുകളെ തമ്മില്‍ ബന്ധിപ്പിക്കുന്ന ചക്കാമ്പുഴ- ഇടക്കോലി- ഉഴവൂര്‍ റോഡ് പൂര്‍ണ്ണമായും ബി.എം ആന്‍ഡ് ബി.സി ടാറിംഗ് നടത്തി പുനര്‍നിര്‍മ്മിച്ച് അന്താരാഷ്ട്ര നിലവാരത്തിലാക്കും. ഇടക്കോലി മുതല്‍ ഉഴവൂര്‍ വരെയുള്ള ഭാഗത്തിന് നേരത്തെ നിര്‍മ്മാണ അനുമതി ലഭിച്ചിരുന്നു.
ഇടക്കോലി ഗവ:ഹയര്‍ സെക്കന്ററി സ്‌കൂളിലേയ്ക്കും ഉഴവൂര്‍ സെന്റ് സ്റ്റീഫന്‍സ് കോളേജിലേക്കും വലവൂര്‍ ട്രിപ്പിള്‍ ഐ.ടി കാമ്പസിലേക്കുമായുള്ള യാത്ര സുഗമാക്കുന്നതിന് നിര്‍ദിഷ്ട റോഡ് വികസന പദ്ധതി ഉപകരിക്കും. രാമപുരം പഞ്ചായത്ത് പ്രസിഡന്റ് ബൈജു ജോണിന്റെ നേത്രത്വത്തില്‍ ബേബി ഉഴുത്തുവാല്‍ , വര്‍ക്കിച്ചന്‍ പാലത്താനം വിക്രമന്‍ നായര്‍ പുല്ലാട്ട് എന്നിവര്‍ കെ.എം മാണി എം.എല്‍.എ മുഖാന്തരം നല്‍കിയ നിവേദനത്തിന്റെ അടിസ്ഥാനത്തിലാണ് ചക്കാമ്പുഴ - ഉഴവൂര്‍ റോഡ് പൂര്‍ണ്ണമായും നിര്‍മ്മിക്കുവാന്‍ അനുമതി ലഭിച്ചത്.ഗ്രാമ മേഖലയുടെ സമഗ്ര വികസനം സാധ്യമാക്കും വിധം ആധുനിക റോഡ് ഗതാഗത സൗകര്യം ലഭ്യമാക്കുന്ന പദ്ധതിക്ക് അംഗീകാരവും അനുമതിയും ലഭ്യമാക്കിയ കെ.എം മാണി എം.ല്‍.എ യെ കേ.കോണ്‍ (എം) ചക്കാംമ്പുഴ സമ്മേളനം അഭിനന്ദിച്ചു.