അടിമാലി: വിവാഹ വാഗ്ദാനം നല്‍കി യുവതിയെ പീഡിപ്പിച്ചു ഗര്‍ഭണിയാക്കിയ സംഭവത്തില്‍ ആസാം സ്വദേശിയായ യുവാവ് അറസ്റ്റില്‍. ചിന്നപ്പാറ ആദിവാസി കുടിയില്‍ താമസിക്കുന്ന രജിത് തണ്‍ ടി (രാജീവ് -27)യെയാണ് അടിമാലി പൊലിസ് അറസ്റ്റ് ചെയ്തത്.
വര്‍ഷങ്ങള്‍ക്കു മുമ്പ് ആസാമില്‍ നിന്ന് അടിമാലിയിലെത്തിയ ഇയാള്‍ ചിന്നപ്പാറകുടിയില്‍ നിന്ന് യുവതിയെ വിവാഹം ചെയ്ത് താമസിക്കുകയായിരുന്നത്രെ. മലയാളം നന്നായി സംസാരിക്കാനറിയാവുന്ന ഇയാള്‍ പ്രാദേശിക ഗാനമേള ട്രൂപ്പില്‍ പാടുന്നതിനിടെയാണ് ട്രൂപ്പിലെ തന്നെ പാട്ടുകാരിയായ 22 കാരിയുമായി പരിചയപ്പെട്ടത്.
തുടര്‍ന്ന് യുവതിയോട് വിവാഹാഭ്യര്‍ത്ഥന നടത്തി. നാലുമാസം മുന്‍പ് അടിമാലിയിലെ രണ്ടു ലോഡ്ജുകളില്‍ വച്ച് പീഡിപ്പിക്കുകയായിരുന്നെന്ന് പൊലിസ് പറഞ്ഞു. മാനസിക രോഗി കൂടിയായ യുവതിയുടെ ബന്ധുക്കളുടെ പരാതിയിന്മേല്‍ അടിമാലി സി ഐ പി.കെ സാബുവിന്റെ നേതൃത്വത്തിലുള്ള സംഘം നടത്തിയ അന്വേഷണത്തിലാണ് ഇയാളെ അറസ്റ്റ് ചെയ്തത്. പ്രതിയെ അടിമാലി കോടതിയില്‍ ഹാജരാക്കി റിമാന്‍ഡ് ചെയ്തു.