തിരുവനന്തപുരം: കുട്ടികളുടെ ഭാവി ഓര്‍ത്തും മാനുഷിക പരിഗണന കണക്കിലെടുത്തുമാണ് നിയമസഭയില്‍ മെഡിക്കല്‍ ബില്ലിനെ പിന്‍തുണച്ചതെന്ന് പ്രതിപക്ഷ നേതാവ് രമേശ് ചെന്നിത്തല.

സ്വാശ്രയ മാനേജ്‌മെന്റ് കോളജുകളുടെ കൊള്ളയ്ക്ക് ഒരിക്കലും കൂട്ടുനില്‍ക്കില്ല. കോളജ് മാനേജ്‌മെന്റുകള്‍ നടത്തിയ നിയമലംഘനത്തെ യുഡിഎഫ് ഒരിക്കലും അംഗീകരിച്ചിരുന്നില്ല.

യുഡിഎഫ് കക്ഷിനേതാക്കള്‍ ഒറ്റക്കെട്ടായാണ് കഴിഞ്ഞ ദിവസം നിയമസഭയില്‍ തീരുമാനമെടുത്തത്. സുപ്രിം കോടതി വിധി അംഗീകരിക്കുന്നുവെന്നും ചെന്നിത്തല പറഞ്ഞു.

വിധി ദൗര്‍ഭാഗ്യകരം

കോടതി വിധി ദൗര്‍ഭാഗ്യകരമെന്നു സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍ പറഞ്ഞു. സര്‍ക്കാര്‍ ഉത്തരവ് കുട്ടികളുടെ ഭാവി കണക്കിലെടുത്തു കൊണ്ടാണ്. സര്‍ക്കാറിന്റെ സദുദ്ദേശം കോടതി മാനിച്ചില്ലെന്നും കോടിയേരി പറഞ്ഞു.

പ്രതിപക്ഷത്തിനും ഏറ്റ പ്രഹരം

കോടതി വിധി സര്‍ക്കാറിനൊപ്പം പ്രതിപക്ഷത്തിനും ഏറ്റ പ്രഹരമെന്നാണ് കെപിസിസി മുന്‍ പ്രസിഡന്റ് വിഎം സുധീരന്‍ പറഞ്ഞത്.