തിരുവനന്തപുരം: തിരുവനന്തപുരം ശ്രീകാര്യത്ത് എലിപ്പനി ബാധിച്ച് അസം സ്വദേശി മരിച്ചു. രണ്ട് പേര്‍ ചികിത്സയില്‍. ശ്രീകാര്യം കിഴങ്ങ് ഗവേഷണ കേന്ദ്രത്തിലെ കരാര്‍ തൊഴിലാളിയായ അജയ് ഉജിര്‍ (22) ആണ് മരിച്ചത്. ഇന്നലെ രാവിലെ ആറ് മണിക്ക് മെഡിക്കല്‍ കോളജ് ആശുപത്രിയില്‍ ചികിത്സയിലിരിക്കെയാണ് മരണം. പാങ്ങപ്പാറയില്‍ നിന്നുള്ള ആരോഗ്യവിഭാഗം പ്രവര്‍ത്തകര്‍ സ്ഥലത്ത് പരിശോധന നടത്തി. 

തൊഴിലാളികളായ രണ്ടുപേരാണ് ചികിത്സയിലുള്ളത്. എലിമൂത്രം കുടിവെള്ളത്തിലൂടെയോ ഭക്ഷണത്തിലൂടെയോ മുറിവുകളിലൂടെയോ ഉള്ളില്‍ കടക്കുന്നതോടെയാണ് രോഗം ഉണ്ടാകുന്നത്. പാടത്തും പറമ്പിലും കൃഷിപ്പണി ചെയ്യുന്നവര്‍, മൃഗങ്ങളുമായി അടുത്തിടപഴകുന്നവര്‍, കശാപ്പുശാലകളിലെ ജീവനക്കാര്‍, ശുചീകരണത്തൊഴിലാളികള്‍ എന്നിവരിലൊക്കെ രോഗം ഉണ്ടാകാനുള്ള സാധ്യത ഏറെയാണ്.

കനത്ത പനി, കണ്ണുകള്‍ ചുവപ്പ് നിറത്തിലേക്ക് മാറുക,തലവേദന,തണുപ്പ്,പേശി വേദന, വയറുവേദന,ഛര്‍ദ്ദി, വയറിളക്കം,മഞ്ഞപ്പിത്തം തുടങ്ങിയ ലക്ഷണങ്ങളുള്ളവര്‍ പരിശോധന നടത്തണം. മലിനജലവുമായി സമ്പര്‍ക്കം വരുന്ന അവസരങ്ങളില്‍ കൈയുറ, പാദരക്ഷകള്‍, മാസ്‌ക് എന്നിവ ഉപയോഗിക്കണമെന്ന് ആരോഗ്യ വകുപ്പ് നിര്‍ദേശിച്ചു.