കോഴിക്കോട്: അഴിമതിയുടെ കൂത്തരങ്ങായി എല്‍.ഡി.എഫ് സര്‍ക്കാര്‍ മാറിയെന്നും ജീവനക്കാരില്‍ ഒരുവിഭാഗം അതിന് കുടപിടിക്കുകയാണെന്നും ഡി.സി.സി പ്രസിഡന്റ് അഡ്വ. ടി. സിദ്ദീഖ്. റവന്യു വകുപ്പും ജോയിന്റ് കൗണ്‍സിലും അഴിമതിയുടെ വികൃതമുഖമായിരിക്കുകയാണ്. സര്‍ക്കാര്‍ ഭൂമി സി.പി.ഐ നേതാക്കള്‍ വില്‍പന നടത്തിയ വയനാട്ടിലെ സംഭവം ഒറ്റപ്പെട്ടതല്ല. സര്‍ക്കാരിനു പണം നല്‍കി എന്തും നടത്താമെന്നതിന്റെ മികച്ച ഉദാഹരണമാണിത്.
ഇതില്‍ ഭരണകൂടത്തിന്റെയും വില്ലേജ് ഓഫിസിന്റെയും ചരടുകള്‍ നീണ്ടുകിടക്കുന്നു. താമരശ്ശേരിയില്‍ ജോയിന്റ് കൗണ്‍സില്‍ നേതാക്കള്‍ കോഴ വാങ്ങുന്നതിനിടയില്‍ അറസ്റ്റിലായ സംഭവവും സമാനമാണ്. മന്ത്രിമാരുടെ അഴിമതി ഏജന്റുമാരെ പോലെയാണ് ഇടതു സര്‍വിസ് സംഘടനകള്‍ പ്രവര്‍ത്തിക്കുന്നതെന്ന് സിദ്ദീഖ് വാര്‍ത്താസമ്മേളനത്തില്‍ പറഞ്ഞു.
റേഷനില്ലെങ്കിലും മദ്യം സുലഭമായി ലഭ്യമാക്കാന്‍ താല്‍പര്യപ്പെടുന്ന സര്‍ക്കാരാണിതെന്നും അദ്ദേഹം പരിഹസിച്ചു. കേന്ദ്ര-സംസ്ഥാന സര്‍ക്കാരുകളുടെ വര്‍ഗീയ ഫാസിസത്തിനും അക്രമങ്ങള്‍ക്കുമെതിരേ കെ.പി.സി.സി പ്രസിഡന്റ് എം.എം ഹസന്‍ നയിക്കുന്ന ജനമോചനയാത്ര 10ന് ജില്ലയില്‍ പര്യടനം നടത്തും. വയനാട്ടില്‍ നിന്നു പുറപ്പെടുന്ന ജാഥ ഉച്ചയ്ക്ക് രണ്ടിന് കാവിലുംപാറ, തൊട്ടില്‍പാലം മേഖലയില്‍ ജില്ലാ കോണ്‍ഗ്രസിന്റെ നേതൃത്വത്തില്‍ ആദ്യ സ്വീകരണം നല്‍കും.
തുടര്‍ന്ന് കുറ്റ്യാടിയില്‍ നടക്കുന്ന വടക്കന്‍ നിയോജക മണ്ഡലം സ്വീകരണ പരിപാടിയില്‍ വടകര, നാദാപുരം, പേരാമ്പ്ര മേഖലയിലുള്ള പ്രവര്‍ത്തകര്‍ പങ്കെടുക്കും. വൈകിട്ട് അരയിടത്തുപാലത്ത് നടക്കുന്ന സ്വീകരണവും പൊതുസമ്മേളനവും എ.ഐ.സി.സി ജനറല്‍ സെക്രട്ടറി മുകുള്‍ വാസ്‌നിക് ഉദ്ഘാടനം ചെയ്യും. മുസ്‌ലിം ലീഗ് ദേശീയ അധ്യക്ഷന്‍ പി.കെ കുഞ്ഞാലിക്കുട്ടി എം.പി മുഖ്യാതിഥിയായിരിക്കും.
ചടങ്ങില്‍ ജില്ലാ കോണ്‍ഗ്രസിന്റെ നേതൃത്വത്തില്‍ സ്വരൂപിച്ച ശുഹൈബ് കുടുംബസഹായ ഫണ്ട് സമര്‍പ്പണവും നടക്കും. പൊതുസമ്മേളനത്തോട് അനുബന്ധിച്ചുള്ള യുവജന പ്രവര്‍ത്തകരുടെ ബൈക്ക് റാലി ഉച്ചയ്ക്ക് ക്രിസ്ത്യന്‍ കോളജില്‍ നിന്ന് ആരംഭിക്കും. അക്രമങ്ങള്‍ക്കെതിരേ ഏപ്രില്‍ ഏഴിനു വടകരയില്‍ നടക്കുന്ന 'അമ്മ മനസ് 'പരിപാടി രാവിലെ ഒന്‍പതിന് മുന്‍ മുഖ്യമന്ത്രി ഉമ്മന്‍ചാണ്ടി ഉദ്ഘാടനം ചെയ്യുമെന്നും സിദ്ദീഖ് അറിയിച്ചു. വാര്‍ത്താസമ്മേളനത്തില്‍ സി. രവീന്ദ്രനും എസ്.കെ അബൂബക്കറും പങ്കെടുത്തു.