ലക്‌നൗ: 2019 ലെ ലോക്‌സഭ തെരഞ്ഞെടുപ്പില്‍ ബിജെപിയെ തോല്‍പ്പിക്കാന്‍ എസ്പിയും ബിഎസ്പിയും സഖ്യം തുടരുന്നു.

ഒരു സ്വകാര്യ ചാനലിന് അനുവദിച്ച അഭിമുഖത്തില്‍ ബിജെപിക്കെതിരേ വിശാലസഖ്യത്തിന് ഒരുങ്ങുകയാണെന്ന് സമാജ്‌വാദി പാര്‍ട്ടി നേതാവ് അഖിലേഷ് യാദവ് പറഞ്ഞു.

ഞങ്ങള്‍ ഒരുമിച്ച് പ്രവര്‍ത്തിക്കും എന്ന കാര്യം വ്യക്തമാണ്. അതിനായുള്ള ചര്‍ച്ചകള്‍ നടക്കും. മായാവതിയുമായി താന്‍ നേരിട്ട് ഇക്കാര്യം സംസാരിച്ചിട്ടില്ല. എന്നാല്‍ അവരുടെ നേതാക്കളുമായി തങ്ങളുടെ പാര്‍ട്ടിയിലെ ചിലര്‍ സംസാരിച്ചിട്ടുണ്ട്. ആദ്യം പാര്‍ട്ടി നിയോഗിച്ചവര്‍ തമ്മില്‍ ചര്‍ച്ചചെയ്യും. അതിനു ശേഷം മാത്രം താന്‍ കാര്യങ്ങള്‍ നേരിട്ട് സംസാരിക്കും- അഖിലേഷ് പറഞ്ഞു.

മാര്‍ച്ചില്‍ ഉത്തര്‍പ്രദേശിലെ ബിജെപിയുടെ ശക്തി കേന്ദ്രങ്ങളെന്ന് വിശേഷിപ്പിച്ചിരുന്ന ഫുല്‍പൂര്‍, ഗൊരഖ്പൂര്‍ മണ്ഡലങ്ങളിലേക്കു നടന്ന ഉപതെരഞ്ഞെടുപ്പില്‍ എസ്പി, ബിഎസ്പി സഖ്യം വന്‍ വിജയം നേടിയിരുന്നു. ഏറെ നാളത്തെ ഇടവേളയ്ക്ക് ശേഷം സമാജ്‌വാദി പാര്‍ട്ടിയും ബഹുജന്‍ സമാജ്‌വാദി പാര്‍ട്ടിയും ഒന്നുചേര്‍ന്ന് മത്സരിച്ച തെരഞ്ഞെടുപ്പായിരുന്നു ഉത്തര്‍പ്രദേശിലേത്.