കോഴിക്കോട്: ദേശീയപാത വികസനത്തിന്റെ കാര്യത്തില്‍ ജനപ്രതിനിധികളുടെ സമയോചിത ഇടപെടല്‍ ഇല്ലാത്തതാണ് ദേശീയപാതക്കെതിരെയുള്ള പ്രക്ഷോഭങ്ങള്‍ക്ക് കാരണമെന്ന് വി.മുരളീധരന്‍ എം.പി. കോഴിക്കോട് നടന്ന പൗരാവലി സ്വീകരണ ചടങ്ങില്‍ സംസാരിക്കുകയായിരുന്നു അദ്ദേഹം. അലൈന്‍മെന്റ് തയാറാക്കിയതിന് ശേഷമാണ് ഇത്തരം പ്രക്ഷോഭങ്ങള്‍ ഉണ്ടാവുന്നത്.
എന്നാല്‍ ഇതിന് മുമ്പ് പൊതുജനങ്ങളുടെ അഭിപ്രായം ബന്ധപ്പെട്ടവര്‍ക്ക് നല്‍കാന്‍ തയാറാവാത്തതാണ് പ്രശ്‌നം വശളാവാന്‍ കാരണം.
പ്രശ്‌നങ്ങള്‍ പരിഹരിക്കാന്‍ പറ്റാത്തവിധം ദുര്‍ഘടമാവുമ്പോള്‍ മാത്രമാണ് ജനപ്രതിനിധികള്‍ ഇടപെടുന്നത്.
കീഴാറ്റൂരിലും തിരൂരിലും ഇപ്പോള്‍ നടക്കുന്നതും ഇത് തന്നെയാണ്.
സംസ്ഥാന സര്‍ക്കാരിന്റെ വികസന പ്രശ്‌നങ്ങള്‍ക്ക് പരിഹാരം കാണാന്‍ മുഖ്യമന്ത്രി മുന്‍കൈ എടുക്കണം.
കക്ഷി രാഷ്ട്രീയ ഭേദമന്യേ ഒന്നിച്ചുള്ള പ്രവര്‍ത്തനം ഉണ്ടായാല്‍ കേരളത്തിലെ പ്രശ്‌നങ്ങള്‍ക്ക് പരിഹാരം കാണാനാവുമെന്നും അദ്ദേഹം പറഞ്ഞു.
കോഴിക്കോട് വിമാനത്താവളവുമായി ബന്ധപ്പെട്ട പ്രശ്‌നങ്ങള്‍ കേന്ദ്ര മന്ത്രാലയത്തെ ബോധ്യപ്പെടുത്തി പരിഹാരം ഉണ്ടാക്കാന്‍ ശ്രമിക്കുമെന്നും മുരളീധരന്‍ പറഞ്ഞു.