തെല്‍ അവീവ്: ദക്ഷിണ ലബനാനില്‍ നിന്നും ആളുകളോട് ഒഴിഞ്ഞ് പോകാന്‍ ആവശ്യപ്പെട്ട് പിന്നാലെ ആക്രമണം നടത്തി ഇസ്‌റഅഈല്‍. ബലാബേക്ക് മേഖലയിലാണ് ആക്രമണമുണ്ടായത്. അഭയാര്‍ഥി ക്യാംപ് ഉള്‍പ്പടെ ഒഴിയണമെന്നായിരുന്നു ഇസ്‌റാഈല്‍ അന്ത്യശാസനം. അന്ത്യശാസനം നല്‍കി മണിക്കൂറുകള്‍ക്കകം ആക്രമണവുമുണ്ടായി. 20ഓളം വ്യോമാക്രമണങ്ങള്‍ നടന്നതായി റിപ്പോര്‍ട്ടുകള്‍ പറയുന്നു. അഞ്ചെണ്ണം സിറ്റിക്കുള്ളില്‍ തന്നെയായിരുന്നുവെന്നും റിപ്പോര്‍ട്ടിലുണ്ട്. 

ഹിസ്ബുല്ലയെ ലക്ഷ്യമിട്ട് ആക്രമണങ്ങള്‍ നടത്തുമെന്നാണ് ഇസ്‌റാഈല്‍ മുന്നറിയിപ്പ്. ഇസ്‌റാഈല്‍ പ്രതിരോധസേന എക്‌സിലൂടെ ഇക്കാര്യം അറിയിക്കുകയും ചെയ്തിട്ടുണ്ട്. ഇസ്‌റാഈല്‍ ആക്രമണം നടത്തിയ സ്ഥലത്താണ് റാഷിദേഹ് അഭയാര്‍ഥി ക്യാംപ് സ്ഥിതി ചെയ്യുന്നത്. ആയിരക്കണക്കിന് ഫലസ്തീന്‍ അഭയാര്‍ഥികളാണ് ക്യാമ്പില്‍ കഴിയുന്നത്. വ്യാഴാഴ്ചയും ലബനാനെ ലക്ഷ്യമിട്ട് ഇസ്‌റാഈല്‍ ആക്രമണങ്ങള്‍ നടന്നിരുന്നു.

തലസ്ഥാനമായ ബെയ്‌റൂത്തിനേയും ബെക്ക താഴ്‌വരയേയും ബന്ധിപ്പിക്കുന്ന അരായ-ഖാലെ റോഡിന് നേരെ ഡ്രോണാക്രമണം ഉണ്ടായി. ബുധനാഴ്ച ഇതേപാതയിലൂടെ സഞ്ചരിക്കുകയായിരുന്ന ഹിസ്ബുല്ലയുടെ വാനിന് നേരെയും ആക്രമണം നടന്നിരുന്നു.

വ്യാഴാഴ്ച നടന്ന ആക്രമണത്തില്‍ ഒരാള്‍ മരിച്ചുവെന്നാണ് ഇസ്‌റാഈല്‍ അറിയിക്കുന്നത്.