നെടുങ്കണ്ടം: വീട്ടില്‍ ചാരായം വാറ്റി തൂക്കുപാലം ചന്തയില്‍ വില്‍ക്കാനെത്തിയ ആളെ നെടുകണ്ടം എക്‌സൈസ് സംഘം പിടികൂടി. പുഷ്പകണ്ടം അണക്കര മെട്ട് സ്വദേശി കാഞ്ഞിരത്തിങ്കല്‍ വീട്ടില്‍ പരമേശ്വരനെയാണ് ഒന്നര ലിറ്റര്‍ വാറ്റുചാരായമായി പിടികൂടിയത്.
എക്‌സൈസ് ഇന്റലിജന്‍സിന് ലഭിച്ച രഹസ്യവിവരത്തിനെ തുടര്‍ന്ന് ഉടുമ്പന്‍ചോല എക്‌സൈസ് സര്‍ക്കിള്‍ ഇന്‍സ്‌പെക്ടര്‍ എ.ജി പ്രകാശിന്റെ നിര്‍ദ്ദേശ പ്രകാരം എക്‌സൈസ് ഇന്‍സ്‌പെക്ടര്‍ കെ.ബി ബിനുവിന്റെ നേതൃത്വത്തില്‍ നടത്തിയ അന്വേഷണത്തിലാണ് പ്രതിയെ പിടികൂടിയത്.
പ്രതിയുടെ വീട്ടില്‍ നിന്നും രണ്ട് കന്നാസുകളിലായ 85 ലിറ്റര്‍ കോടയും, വാറ്റ് ഉപകരണങ്ങളും, ചാരായവും എക്‌സൈസ് സംഘം കണ്ടെടുത്തു. തൂക്കുപാലം മാര്‍ക്കറ്റില്‍ സ്ഥിരമായി വാറ്റ് ചാരായം വില്‍പ്പന നടത്തുന്നുണ്ടെന്ന വിവരത്തിന്റെ അടിസ്ഥാനത്തില്‍ എക്‌സൈസ് സംഘം നിരീക്ഷിച്ച് വരികയായിരുന്നു. ട്രിപ്പ് ജീപ്പില്‍ എത്തിയ പരമേശ്വരനെ ചാരയവുമായി കൈയോടെ പിടികൂടുകയായിരുന്നു. എക്‌സൈസ് പ്രിവന്റീവ് ഓഫിസര്‍മാരായ എം.പി പ്രമോദ്, കെ.ആര്‍ ബാലന്‍, ഇന്റലിജന്‍സ് പ്രിവന്റീവ് ഓഫിസര്‍ ലിജോ ഉമ്മന്‍, സിവില്‍ എക്‌സൈസ് ഓഫിസര്‍മാരായ കെ.കെ സജിത്കുമാര്‍, എം.എസ് അരുണ്‍, എം നൗഷാദ്, കെ ഷനേജ്, കെ. പ്രകാശ് എന്നിവര്‍ റെയ്ഡിന് നേതൃത്വം നല്‍കി. പ്രതിയെ റിമാന്‍ഡ് ചെയ്തു.