മുംബൈ: ഇന്ത്യന്‍ പ്രീമിയര്‍ ലീഗിലെ ചെന്നൈ ടീമിന്റെ മത്സരങ്ങള്‍ മാറ്റില്ല. ഷെഡ്യൂള്‍ പ്രകാരം മത്സരങ്ങള്‍ ചെപ്പോക്കിലെ എം.എ ചിദംബരം സ്‌റ്റേഡിയത്തില്‍ നടക്കുമെന്ന് ഐ.പി.എല്‍ ചെയര്‍മാന്‍ രാജീവ് ശുക്ല വ്യക്തമാക്കി.

രാഷ്ട്രീയ വിവാദങ്ങള്‍ ഐ.പി.എല്ലിലേക്ക് വലിച്ചിഴക്കരുതെന്നും മത്സരത്തിനാവശ്യമായ സുരക്ഷാ ക്രമീകരണങ്ങള്‍ ഏര്‍പ്പെടുത്തുമെന്നും രാജീവ് ശുക്ല പറഞ്ഞു. കാവേരി നദീജല പ്രശ്‌നത്തെ തുടര്‍ന്ന് ചെന്നൈ സൂപ്പര്‍ കിങ്‌സിന്റെ ഹോം മത്സരങ്ങള്‍ ചെന്നൈയില്‍ നിന്ന് മാറ്റുമെന്ന് വാര്‍ത്തകളുണ്ടായിരുന്നു. വേദി സംബന്ധിച്ച് കേരള ക്രിക്കറ്റ് അസോസിയേഷനുമായി ബി.സി.സി.ഐ ചര്‍ച്ച നടത്തുകയും ചെയ്തിരുന്നു. തിരുവനന്തപുരം ഗ്രീന്‍ഫില്‍ഡ് സ്റ്റേഡിയം മത്സരങ്ങള്‍ക്ക് വേദിയാവാന്‍ സാധ്യതയുണ്ടെന്നും പറഞ്ഞിരുന്നു.

ചൊവ്വാഴ്ചയാണ് ചെപ്പോക്ക് സ്‌റ്റേഡിയത്തിലെ ആദ്യ മത്സരം. കൊല്‍ക്കത്ത നൈറ്റ് റൈഡേഴ്‌സാണ് ചെന്നൈയുടെ എതിരാളികള്‍.