മനാമ: 'സുസ്ഥിര വികസന ലക്ഷ്യങ്ങള്‍ക്ക് സ്‌പോര്‍ട്‌സിന്റെ പങ്ക് ' പ്രമേയത്തില്‍ പ്രഥമ അറബ് കായിക സമ്മേളനം ഇന്നു മുതല്‍ ബഹറൈനില്‍ നടക്കും. മുഹറഖിലെ ആര്‍ റൊട്ടാന അംവാജ് ഹോട്ടലാണ് വേദി. 10, 11 തിയതികളിലായി സമ്മേളനം നടക്കുന്ന വിവരം യുവജന കായികകാര്യ മന്ത്രാലയം അണ്ടര്‍ സെക്രട്ടറി ഖാലിദ് അല്‍ഹാജ് നേരത്തെ പ്രഖ്യാപിച്ചിരുന്നു. 

ബഹ്‌റൈന്‍ യുവജന സ്‌പോര്‍ട്‌സ് മന്ത്രാലയം ബഹ്‌റൈനിലെ യുനൈറ്റഡ് നാഷന്‍സ് ഓഫിസുമായും ഇന്റര്‍നാഷനല്‍ കൗണ്‍സില്‍ ഫോര്‍ ഹെല്‍ത്ത് ഫിസിക്കല്‍ എജ്യുക്കേഷന്‍, സ്‌പോര്‍ട്‌സ് ആന്‍ഡ് റിക്രിയേഷന്‍ എന്നിവയുമായി സഹകരിച്ചാണ് സമ്മേളനം. എല്ലാ ഒരുക്കങ്ങളും പൂര്‍ത്തിയായതായും വിവിധ മേഖലകളില്‍ ഐക്യരാഷ്ട്രസഭ മുന്നോട്ടു വയ്ക്കുന്ന 17 വികസന ലക്ഷ്യങ്ങള്‍ പൂര്‍ത്തിയാക്കുന്നതിനാല്‍ സ്‌പോര്‍ട്‌സിന്റെ സംഭാവനകളും പ്രാധാന്യവും അടയാളപ്പെടുത്തുന്നതായിരിക്കും സമ്മേളനമെന്നും ഖാലിദ് അല്‍ഹാജ് കൂട്ടിച്ചേര്‍ത്തു.
അറബ് ലോകത്തെ വിവിധ രാജ്യങ്ങള്‍ പങ്കെടുക്കുന്ന സമ്മേളനത്തെ പൂര്‍ണ പ്രതീക്ഷയോടെയാണ് കാണുന്നതെന്ന് ബഹ്‌റൈന്‍ ഒളിംപിക് കമ്മിറ്റിയും യുവജനകാര്യ കായിക മന്ത്രാലയവും വ്യക്തമാക്കി. ബഹ്‌റൈന്‍ അടക്കം സഊദി, കുവൈത്ത്, ഈജിപ്ത്, ജോര്‍ദാന്‍, ഇറാഖ്, സുദാന്‍, ലിബിയ, മൊറോക്കോ, തുനീസ്യ, മൗറിത്താനിയ തുടങ്ങി 12 രാജ്യങ്ങള്‍ പങ്കെടുക്കും.