ലക്കിടി: വയനാട് ചുരത്തില്‍ ചത്ത പോത്തിനെ തള്ളി. ചുരം ഒന്‍പതാം വളവിന് താഴെയാണ് ആറ് മാസത്തിലധികം പ്രായമായ ചത്ത പോത്തിനെ തള്ളിയത്. ദുര്‍ഗന്ധം മൂലം പരിശോധന നടത്തിയ ചുരം സംരക്ഷണ സമിതി പ്രവര്‍ത്തകരാണ് ജഡം കണ്ടെത്തിയത്.
വയനാട്ടിലേക്ക് കാലിയെ കൊണ്ടുപോകുന്നവരാണ് ജഡം തളളിയതെന്ന് സംശയിക്കുന്നതായി സംരക്ഷണ സമിതി പ്രവര്‍ത്തകര്‍ പറഞ്ഞു. കുടിവെള്ളം മലിനമാവുന്നത് കാരണം വര്‍ഷകാലത്ത് ചുരം സംരക്ഷണ സമിതി പ്രവര്‍ത്തകര്‍ രാപ്പകല്‍ ജാഗ്രത പാലിക്കാറുണ്ടായിരുന്നു. സംരക്ഷണ സമിതി പ്രവര്‍ത്തകര്‍ പൊലിസ്, വനം വകുപ്പ് ഉദ്യോഗസ്ഥര്‍ എന്നിവരെ വിവരമറിയിച്ചു. ഇത്തരത്തില്‍ പ്ലാസ്റ്റിക് ഉള്‍പ്പടെ വിവിധ മാലിന്യങ്ങള്‍ ചുരത്തില്‍ തള്ളുന്നതായും പ്രധാന കുടിവെള്ള സ്രോതസുകള്‍ ഉള്‍പ്പടെ മലിനപ്പെടുന്നതായും ചുരം സംരക്ഷണ സമിതി പ്രവര്‍ത്തകര്‍ പറഞ്ഞു.