ചെറുവത്തൂര്‍ (കാസര്‍കോട് ): ഊര്‍ജസംരക്ഷണത്തിനായി പിലിക്കോട് പഞ്ചായത്ത് നടപ്പാക്കിയ ഫിലമെന്റ് ബള്‍ബ് രഹിത പദ്ധതിയുടെ മാതൃകയില്‍ ഫിലമെന്റ് ബള്‍ബ് രഹിത കേരളം പദ്ധതി നടപ്പാക്കാന്‍ ആലോചിക്കുന്നതായി മുഖ്യമന്ത്രി പിണറായി വിജയന്‍. ഇതിന്റെ കരട് സര്‍ക്കാര്‍ ചര്‍ച്ചചെയ്ത് കഴിഞ്ഞു. 

രാജ്യത്തെ ആദ്യ ഫിലമെന്റ് ബള്‍ബ് രഹിത പഞ്ചായത്തായി പിലിക്കോടിനെ പ്രഖ്യാപിച്ച് സംസാരിക്കുകയായിരുന്നു അദ്ദേഹം. കേരളത്തിന് ആവശ്യമായ വൈദ്യുതിയുടെ 30 ശതമാനം മാത്രമാണ് ഇവിടെ ഉല്‍പാദിപ്പിക്കുന്നത്. അത് ഇന്ധനങ്ങളില്‍ നിന്നും വെള്ളത്തില്‍ നിന്നുമാണ്. ഒരു യൂനിറ്റ് വൈദ്യുതി ഉപയോഗം കുറക്കാന്‍ കഴിഞ്ഞാല്‍ ഒരു കിലോഗ്രാം കല്‍ക്കരി കത്തിക്കുന്നത് ഒഴിവാക്കാന്‍ പറ്റും. വൈദ്യുതി ഉപയോഗം കുറയ്ക്കുന്നത് ചെലവു കുറയ്ക്കുന്നതിന് മാത്രമല്ല, ആഗോള താപനം ചെറുക്കുന്നതിനും സഹായിക്കുമെന്ന തിരിച്ചറിവിലേക്ക് ബഹുഭൂരിപക്ഷം ജനങ്ങളും എത്തിച്ചേര്‍ന്നിട്ടില്ല. വീടുകളിലും കെട്ടിടങ്ങളിലും സോളാര്‍ പാനല്‍ സ്ഥാപിച്ച് വൈദ്യുതി കണ്ടെത്താനുള്ള പദ്ധതികള്‍ നടപ്പാക്കണം. നാളത്തെ തലമുറക്കുവേണ്ടിയുള്ള നിസ്വാര്‍ഥ സേവനമാണ് ഇത്തരം പദ്ധതികളിലൂടെ നടപ്പാക്കുന്നതെന്നും മുഖ്യമന്ത്രി പറഞ്ഞു.