തൃശൂര്‍: പി.ഡി.പി സില്‍വര്‍ ജൂബിലിയോടനുബന്ധിച്ച് ഫാഷിസ്റ്റ് ഭീകരതക്കെതിരേ സംഘടിപ്പിക്കുന്ന രാജ്യരക്ഷാ റാലിയും മഹാസമ്മേളനവും ഇന്നും നാളെയുമായി തൃശൂര്‍ എം.ജി റോഡിലെ മോത്തിമഹല്‍ ഹാളില്‍ നടക്കുമെന്ന് സംഘാടകര്‍ വാര്‍ത്താസമ്മേളനത്തില്‍ അറിയിച്ചു. ഇന്ന് രാവിലെ 11 ന് പതാക ഉയര്‍ത്തുന്നതോടെ പരിപാടികള്‍ക്ക് തുടക്കമാകും. വൈകിട്ട് മൂന്നിന് നടക്കുന്ന പി.ഡി.പിയുടെ തൊഴിലാളി സംഘടനയായ പി.ടി.യു.സിയുടെ ആഭിമുഖ്യത്തിലുള്ള തൊഴിലാളി സംഗമം ഐ.എന്‍.ടി.യു.സി സംസ്ഥാന പ്രസിഡന്റ് ആര്‍ ചന്ദ്രശേഖരന്‍ ഉദ്ഘാടനം ചെയ്യും. നാളെ വൈകിട്ട് മൂന്നിന് ഫാഷിസ്റ്റ് ഭീകരതക്കെതിരേ രാജ്യരക്ഷാ റാലി നടക്കും. അഞ്ചിന് നടക്കുന്ന സില്‍വര്‍ ജൂബിലി മഹാസമ്മേളനം ആര്‍.ജെ.ഡി ദേശീയ ഉപാധ്യക്ഷന്‍ ശിവാനന്ദ് തിവാരി ഉദ്ഘാടനം ചെയ്യും. സില്‍വര്‍ ജൂബിലിയുടെ ഭാഗമായി നിര്‍ധനര്‍ക്ക് വേണ്ടി ആരംഭിക്കുന്ന ബൈത്തുസബാഹ് ഭവന പദ്ധതിയുടെ ആദ്യവീടിന്റെ താക്കോല്‍ദാനവും അദ്ദേഹം നിര്‍വഹിക്കും. വാര്‍ത്താസമ്മേളനത്തില്‍ പി.ഡി.പി സംസ്ഥാന ഉപാധ്യക്ഷന്‍ പൂന്തുറ സിറാജ്. പി.ഡി.പി സീനിയര്‍ സംസ്ഥാന ജനറല്‍ സെക്രട്ടറി കെ.ഇ അബ്ദുല്ല, സംസ്ഥാന ജനറല്‍ സെക്രട്ടറി മൈലക്കാട് ഷാ, ജില്ലാ പ്രസിഡന്റ് മജീദ് ചേര്‍പ്പ്, ജില്ലാ ഭാരവാഹികളായ കക്കാട് നൗഷാദ്, നജീബ് പുലിക്കണ്ണി, സിനോജ് കാഞ്ഞിരപ്പുഴ പങ്കെടുത്തു.