തിരുവനന്തപുരം: സര്‍ക്കാരിന് അവകാശപ്പെട്ട ഹാരിസണ്‍ കമ്പനിയുടെ ഭൂമി വീണ്ടെടുക്കുന്നതിന് അടിയന്തര നിയമനിര്‍മാണത്തിന് സര്‍ക്കാര്‍ തയാറാകണമെന്ന് ബി.ജെ.പി സംസ്ഥാന പ്രസിഡന്റ് കുമ്മനം രാജശേഖരന്‍. ഇക്കാര്യം ആവശ്യപ്പെട്ടു അദ്ദേഹം മുഖ്യമന്ത്രിക്ക് കത്ത് നല്‍കി.
ഓര്‍ഡിനന്‍സ് പുറപ്പെടുവിക്കുകയോ പ്രത്യേക നിയമസഭാ സമ്മേളനം വിളിച്ചുകൂട്ടി ബില്‍ പാസാക്കുകയോ ചെയ്ത് പാട്ടക്കാലാവധി കഴിഞ്ഞ അഞ്ചുലക്ഷം ഹെക്ടര്‍ ഭൂമിയില്‍ സര്‍ക്കാരിനുള്ള അവകാശാധികാരം ഉറപ്പാക്കണം.
അതിന് ഉടന്‍ കഴിയില്ലെങ്കില്‍ ഹൈക്കോടതി വിധി സ്റ്റേ ചെയ്യുന്നതിന് സുപ്രിംകോടതിയെ സമീപിക്കാന്‍ വൈകരുതെന്നും അദ്ദേഹം കത്തില്‍ ആവശ്യപ്പെട്ടിട്ടുണ്ട്.