കൊച്ചി: വരാപ്പുഴയില്‍ യുവാവ് കസ്റ്റഡിയില്‍ മരിച്ച സംഭവത്തില്‍ ആദ്യം സസ്‌പെന്‍ഡ് ചെയ്ത മൂന്നുപൊലിസുകാരെ പ്രത്യേക അന്വേഷണസംഘം മണിക്കൂറുകളോളം ചോദ്യംചെയ്തു. കളമശ്ശേരി എ.ആര്‍.ക്യാംപിലെ പൊലിസുകാരായ ജിതിന്‍ രാജ്, സന്തോഷ് കുമാര്‍, സുമേഷ് എന്നിവരെയാണ് ഐ.ജി എസ്. ശ്രീജിത്തിന്റെ നേതൃത്വത്തില്‍ ചോദ്യം ചെയ്തത്. രാവിലെ പത്തരയോടെ ആലുവ പൊലിസ് ക്ലബ്ബില്‍ വിളിച്ചുവരുത്തിയ ഇവരെ രാത്രി ഏഴരയോടെയാണ് വിട്ടയച്ചത്. ശ്രീജിത്തിനെ വീട്ടില്‍ നിന്ന് കൊണ്ടുവന്നതുമുതലുള്ള സംഭവങ്ങള്‍ വിശദമായി ചോദ്യം ചെയ്തതായാണ് വിവരം. ശ്രീജിത്തിന്റെ അമ്മയുടെയും ഭാര്യയുടെയും മൊഴികളുടെ അടിസ്ഥാനത്തിലും പോസ്റ്റ്‌മോര്‍ട്ടം റിപ്പോര്‍ട്ടിന്റെ അടിസ്ഥാനത്തിലുമായിരുന്നു ചോദ്യം ചെയ്യല്‍. ശ്രീജിത്തിന്റെ അറസ്റ്റിനു പിന്നില്‍ ആരുടെയെങ്കിലും പ്രേരണയോ സമ്മര്‍ദമോ ഉണ്ടായിട്ടുണ്ടോ എന്നുള്ള വിവരങ്ങളും ആരാഞ്ഞു. പോസ്റ്റുമോര്‍ട്ടം നടത്തിയ ഡോക്ടര്‍മാരുടെ മൊഴി വീണ്ടുമെടുക്കുമെന്ന് അന്വേഷണ സംഘം വ്യക്തമാക്കി.