പുതുക്കാട്: മലയോര മേഖലയായ എച്ചിപ്പാറയിലെ ഏക റേഷന്‍ കടയിലാണു ഇന്റര്‍നെറ്റ് ലഭ്യമാകാത്തതിനെ തുടര്‍ന്നു ഇപോസ് മെഷീന്‍ നിശ്ചലമായത്. തോട്ടം വനം മേഖലയും ആദിവാസി ഊരും ഉള്‍പ്പെട്ട പ്രദേശത്തെ 250 കുടുംബങ്ങളാണു റേഷന്‍ സാധനങ്ങള്‍ ലഭിക്കാതെ ദുരിതത്തിലായത്.
എച്ചിപ്പാറയില്‍ പ്രവര്‍ത്തിക്കുന്ന റേഷന്‍ കടയില്‍ വ്യാഴാഴ്ചയും വെള്ളിയാഴ്ചയായും ആറുപേര്‍ക്കു മാത്രമാണു റേഷന്‍ നല്‍കിയത്.
റേഷന്‍ വിതരണം ആരംഭിച്ചു ഏറെ കഴിയും മുന്‍പേ ഇന്റര്‍നെറ്റ് റെയ്ഞ്ചു ലഭ്യമല്ലാതാവുകയായിരുന്നു. അതോടെ ഇന്റര്‍നെറ്റിന്റെ സഹായത്തോടെ പ്രവര്‍ത്തിക്കുന്ന ഇ-പോസ് മെഷീന്‍ പ്രവര്‍ത്തനരഹിതമായി. സാധാരണ ഉച്ച വരെ മാത്രം പ്രവര്‍ത്തിക്കുന്ന റേഷന്‍ കട ഇന്റര്‍നെറ്റ് പ്രശ്‌നം പരിഹരിക്കാനാവാതിരുന്നതോടെ രാവിലെ തന്നെ അടക്കുകയായിരുന്നു. ജില്ലയിലെ എല്ലാ റേഷന്‍ കടകളിലും ഇ-പോസ് സംവിധാനം ഏര്‍പ്പെടുത്തിയിട്ടുണ്ടെങ്കിലും മലയോര മേഖലയില്‍ റേഞ്ച് പ്രശ്‌നം അനുഭവപ്പെടുന്നുണ്ട്. ജില്ലയിലെ 20 റേഷന്‍ കടകള്‍ക്കു സമാനമായ പ്രശ്‌നം നേരിടുന്നുണ്ട്.
ബ്ലൂസ്റ്റാര്‍ ആന്റിന സംവിധാനം സ്ഥാപിച്ചു റേഞ്ച് പ്രശ്‌നം പരിഹരിക്കാനാവുമെങ്കിലും ഇതുവരെ നടപ്പാക്കിയിട്ടില്ല. നാളെ വിഷു ആഘോഷിക്കാനിരിക്കെ റേഷന്‍ വിതരണം മുടങ്ങിയതില്‍ തോട്ടം മേഖല ആശങ്കയിലാണ്.
റേയ്ഞ്ച് പ്രശ്‌നം ഇന്നും അനുഭവപ്പെടുകയാണെങ്കില്‍ മുന്‍കാലങ്ങളിലേതുപോലെ റേഷന്‍ വിതരണം നടത്തണമെന്നാണു നാട്ടുകാരുടെ ആവശ്യം.