വടക്കാഞ്ചേരി: സംസ്ഥാന സര്‍ക്കാരിന്റെ ആര്‍ദ്രം പദ്ധതിയിലൂടെ വികസന മുന്നേറ്റ കുതിപ്പിന്റെ പാതയിലൂടെ പ്രയാണം നടത്തുന്ന തെക്കുംകര പഞ്ചായത്തിലെ വീരോലിപ്പാടം കുടുംബാരോഗ്യ കേന്ദ്രത്തില്‍ സ്വകാര്യ ആശുപത്രികളെ വെല്ലും സജ്ജീകരണങ്ങളാണ്.
കുടുംബാരോഗ്യ കേന്ദ്രം രോഗീ സൗഹൃദമാക്കുകയെന്ന ലക്ഷ്യത്തോടെയാണു ജനകീയ പങ്കാളിത്തത്തോടെ ആശുപത്രിയുടെ സമൂല പരിഷ്‌കരണം ഉറപ്പാക്കുന്നത്.
പൂന്തോട്ടം, അക്വേറിയം, ടെലിവിഷനു പുറമെ ചുമരുകളുടെ വര്‍ണക്കൂട്ടുകള്‍ക്കുമുണ്ട് മനോഹാരിതയേറെ. കുട്ടികളുടെ ഇഞ്ചക്ഷന്‍ മുറി ഏറ്റവും മനോഹരമായാണു സജ്ജീകരിച്ചിട്ടുള്ളത്. കാര്‍ട്ടൂണ്‍ കഥാപാത്രങ്ങളുടെ വര്‍ണഭംഗി പറഞ്ഞറിയിക്കാനാകാത്തതാണ്.
സ്‌പൈഡര്‍മാന്‍, ഡോറ, ചോട്ടാ ഭീം, ടോം ആന്‍ഡ് ജെറി തുടങ്ങി ഇങ്ങനെ പോകുന്നു ചിത്ര വൈവിധ്യം.
മച്ചാടിന്റെ ചിത്രകാരന്‍ ഷാജു കുറ്റിക്കാടനാണു ഏറ്റവും മികവോടെ ഓരോ ചിത്രങ്ങളും വരച്ചത്. സ്‌പൈഡര്‍മാന്റെ ത്രീഡി ചിത്രം ആരേയും ആകര്‍ഷിക്കുന്നതാണ്. കഥാപാത്രത്തിന്റെ കൈ പിടിച്ചു ഫോട്ടോ എടുക്കാം.
ഇതിനകം തന്നെ നിരവധി ചിത്രങ്ങള്‍ക്കു ദൃശ്യ ഭംഗി പകര്‍ന്നിട്ടുണ്ട് ഷാജു.
മച്ചാട് മാമാങ്കത്തിന്റെ പറയെടുപ്പും കുതിരയെഴുന്നള്ളിപ്പും നാടന്‍ കലാരൂപങ്ങളുടെ അവതരണവുമൊക്കെ ഒട്ടും മികവു നഷ്ടപ്പെടുത്താതെ ക്യാന്‍വാസിലേക്കു പകര്‍ന്നും ഷാജു ഇതിനോടകം തന്നെ ശ്രദ്ധേയനാണ്.