നാദാപുരം: ഈ മാസം 18 മുതല്‍ മുംബൈയില്‍ നടക്കുന്ന നാഷനല്‍ സ്‌കൂള്‍ ഗേള്‍സ് ഫുട്‌ബോള്‍ ചാംപ്യന്‍ഷിപ്പില്‍ കേരള ടീമിന്റെ വൈസ് ക്യാപ്റ്റനായി പുറമേരി കടത്തനാട് രാജാസ് ഫുട്‌ബോള്‍ അക്കാദമിയിലെ അശ്വതി എസ്. വര്‍മ്മയെയും ഗോള്‍ കീപ്പറായി കെ. നിസരിയെയും തിരഞ്ഞെടുത്തു. ടീം നാളെ മുംബൈയിലേക്ക് യാത്ര തിരിക്കും. ഇരുവരും സംസ്ഥാന ജൂനിയര്‍ ടീമിലെ അംഗങ്ങളാണ്. ആറു വര്‍ഷമായി കടത്തനാട് ഫുട്‌ബോള്‍ അക്കാദമിയില്‍ പരിശീലനം നടത്തി വരികയാണ്. അശ്വതി പുറമേരി ശ്രീശൈലം വീട്ടില്‍ ഇ.കെ മണികണ്ഠ വര്‍മ്മ രാജയുടെയും ശ്രീജവര്‍മ്മയുടെയും മകളാണ്. പുറമേരി പുത്തലത്താ കണ്ടിയില്‍ സുകുവിന്റെയും സ്വപ്നയും മകളാണ് നിസരി. ഇരുവരും കടത്തനാട് രാജാസ് ഹയര്‍ സെക്കന്‍ഡറി വിദ്യാര്‍ഥികളാണ്. റിട്ട. എസ്.ഐ സുരേന്ദ്രന്റെയും അധ്യാപകന്‍ എം.കെ പ്രദീപിന്റെയും കീഴിലാണ് പരശീലനം നടത്തുന്നത്.