മാഡ്രിഡ്: സ്പാനിഷ് ലാ ലിഗയുടെ ചരിത്രത്തിലാദ്യമായി ഒരു ടീം ഏറ്റവും കൂടുതല്‍ കാലം പരാജയമറിയാതെ മുന്നേറിയതിന്റെ റെക്കോര്‍ഡ് ബാഴ്‌സലോണ സ്വന്തമാക്കി. സെല്‍റ്റ വിഗോയ്‌ക്കെതിരായ പോരാട്ടത്തില്‍ 2-2ന് സമനില സ്വന്തമാക്കിയാണ് 33 മത്സരങ്ങളില്‍ പരാജയമറിയാതെ മുന്നേറി ബാഴ്‌സലോണ ലാ ലിഗ റെക്കോര്‍ഡ് സ്വന്തമാക്കിയത്. 25 വിജയങ്ങളും എട്ട് സമനിലകളുമായാണ് കറ്റാലന്‍ പട റെക്കോര്‍ഡിട്ടത്. 1979-80 കാലത്ത് റയല്‍ സോസിഡാഡ് 32 മത്സരങ്ങള്‍ ഇത്തരത്തില്‍ മുന്നേറി റെക്കോര്‍ഡിട്ടിരുന്നു. ഈ റെക്കോര്‍ഡ് പിന്തള്ളിയാണ് സ്പാനിഷ് കിരീടത്തിനിരികില്‍ നില്‍ക്കുന്ന ബാഴ്‌സയുടെ നേട്ടം. ലാ ലിഗയില്‍ അഞ്ച് മത്സരങ്ങള്‍ കൂടിയാണ് ഇനി സീസണില്‍ ബാഴ്‌സയ്ക്ക് ബാക്കിയുള്ളത്. അഞ്ചിലും പരാജയപ്പെടാതെ മുന്നേറിയാല്‍ ലീഗിന്റെ ചരിത്രത്തിലാദ്യമായി ഈ നേട്ടം സ്വന്തമാക്കുന്ന ടീമായും ബാഴ്‌സലോണയ്ക്ക് ചരിത്രമെഴുതാം. ചാംപ്യന്‍സ് ലീഗ് ക്വാര്‍ട്ടറില്‍ പുറത്തായതിന്റെ ക്ഷീണം അവര്‍ക്ക് ഈ നേട്ടങ്ങളിലൂടെ മറികടക്കാനുള്ള അവസരമുണ്ട്. എന്നാല്‍ വലിയൊരു കടമ്പ അവര്‍ക്ക് മുന്നിലുണ്ട്. മെയ് ആറിന് നടക്കുന്ന സീസണിലെ രണ്ടാം എല്‍ ക്ലാസിക്കോ. മത്സരം റയലിന്റെ തട്ടകമായ നൗ കാംപിലാണ് അരങ്ങേറുന്നത്.
ബാഴ്‌സലോണയെ സെല്‍റ്റ വിഗോ സ്വന്തം തട്ടകത്തില്‍ സമനിലയില്‍ തളയ്ക്കുകയായിരുന്നു. 36ാം മിനുട്ടില്‍ ഉസ്മാന്‍ ഡെംബലെ ഗോള്‍ നേടി ബാഴ്‌സയെ മുന്നിലെത്തിച്ചെങ്കിലും 45ാം മിനുട്ടില്‍ സെല്‍റ്റ ജോണി കാസ്‌ട്രോയിലൂടെ സമനില സ്വന്തമാക്കി. 64ാം മിനുട്ടില്‍ പാക്കോ അല്‍ക്കാസര്‍ കറ്റാലന്‍ ടീമിനെ വീണ്ടും മുന്നിലെത്തിച്ചെങ്കിലും 82ാം മിനുട്ടില്‍ ലഗോ അസ്പാസിലൂടെ സെല്‍റ്റ സമനില സ്വന്തമാക്കി. മറ്റൊരു മത്സരത്തില്‍ വിയ്യാറല്‍ 2-1ന് ലെഗാനസിനെ കീഴടക്കിയപ്പോള്‍ കരുത്തരായ സെവിയ്യയെ ഡിപോര്‍ടീവോ ലാ കൊരുണ സ്വന്തം തട്ടകത്തില്‍ ഗോള്‍രഹിത സമനിലയില്‍ തളച്ചു.

സമനിലക്കളികള്‍

ലണ്ടന്‍: ഇംഗ്ലീഷ് പ്രീമിയര്‍ ലീഗ് പോരാട്ടത്തില്‍ സമനിലക്കളികള്‍. ടോട്ടനം എവേ പോരാട്ടത്തില്‍ ബ്രൈറ്റന്‍ ഹോവ് ആല്‍ബിയോണുമായി 1-1ന് സമനിലയില്‍ പിരിഞ്ഞു. അവസാന നിമിഷം ആന്‍ഡി കരോള്‍ നേടിയ ഗോളില്‍ സ്വന്തം തട്ടകത്തില്‍ വെസ്റ്റ് ഹാം യുനൈറ്റഡ് 1-1ന് സ്റ്റോക് സിറ്റിയെ സമനിലയില്‍ തളച്ചു.

ഇന്റര്‍ മൂന്നാം സ്ഥാനത്ത്

മിലാന്‍: ഇറ്റാലിയന്‍ സീരി എ പോരാട്ടത്തില്‍ ഇന്റര്‍ മിലാന് തകര്‍പ്പന്‍ ജയം. സ്വന്തം തട്ടകത്തില്‍ അവര്‍ കഗ്ലിയാരിയെ മറുപടിയില്ലാത്ത നാല് ഗോളുകള്‍ക്ക് വീഴ്ത്തി. ജയത്തോടെ അവര്‍ പോയിന്റ് പട്ടികയില്‍ മൂന്നാം സ്ഥാനത്തേക്ക് കയറി ചാംപ്യന്‍സ് ലീഗ് പ്രവേശം സജീവമാക്കി.

മെയ്ന്‍സിന് ജയം

മ്യൂണിക്ക്: ജര്‍മന്‍ ബുണ്ടസ് ലീഗ പോരാട്ടത്തില്‍ മെയ്ന്‍സ് ഫ്രീബര്‍ഗിനെ 2-0ത്തിന് പരജയപ്പെടുത്തി.