വാഷിങ്ടണ്‍: ഉത്തര കൊറിയന്‍ നേതാവ് കിം ജോങ് ഉന്നുമായി നിശ്ചയിച്ച കൂടിക്കാഴ്ച ഫലപ്രദമല്ലെങ്കില്‍ ഇറങ്ങിപ്പോരുമെന്ന് യു.എസ് പ്രസിഡന്റ് ഡൊണാള്‍ഡ് ട്രംപ്. ഫ്‌ളോറിഡയില്‍ ജപ്പാന്‍ പ്രസിഡന്റ് ഷിന്‍സോ ആബെയുമായി ചേര്‍ന്നു നടത്തിയ സംയുക്ത വാര്‍ത്താ സമ്മേളനത്തിലാണ് ട്രംപ് ഇക്കാര്യം വ്യക്തമാക്കിയത്. ആണവ നിരായുധീകരണത്തിന് ഉ.കൊറിയയ്ക്കുമേല്‍ പരമാവധി സമ്മര്‍ദം ചെലുത്തുന്നതു തുടരുമെന്നും ഇരുവരും അറിയിച്ചു.
ഫ്‌ളോറിഡയിലെ മാരെ ലാഗോ റിസോര്‍ട്ടില്‍ വച്ചാണ് ട്രംപും ആബെയും തമ്മില്‍ കൂടിക്കാഴ്ച നടന്നത്. ഈ വാരം ആദ്യത്തില്‍ നിയുക്ത യു.എസ് ദേശീയ സെക്രട്ടറിയും നിലവിലെ സി.ഐ.എ ഡയരക്ടറുമായ മൈക് പോംപിയോ ഉ.കൊറിയ സന്ദര്‍ശിച്ച വിവരം കൂടിക്കാഴ്ചയില്‍ ട്രംപ് വെളിപ്പെടുത്തി. കിമ്മുമായി നടക്കുന്ന കൂടിക്കാഴ്ചയുടെ വിവരങ്ങള്‍ ചര്‍ച്ച ചെയ്യാനായായിരുന്നു സന്ദര്‍ശനമെന്നാണു വിവരം. കിമ്മും പോംപിയോയും തമ്മില്‍ നല്ല സൗഹൃദം രൂപപ്പെട്ടിട്ടുണ്ടെന്നും ഇരുവരും തമ്മിലുള്ള കൂടിക്കാഴ്ച നല്ല നിലയില്‍ അവസാനിച്ചുവെന്നും ട്രംപ് അറിയിച്ചു. 2000ത്തിനു ശേഷം അമേരിക്കയും ഉ.കൊറിയയും തമ്മിലുള്ള ഏറ്റവും ഉന്നത തലത്തിലുള്ള നയതന്ത്ര കൂടിക്കാഴ്ചയാണിത്.
'മുന്‍പ് വ്യക്തമാക്കിയ പോലെ ഉ.കൊറിയ ആണവ നിരായുധീകരണത്തിന് തയാറായാല്‍ എല്ലാ അര്‍ഥത്തിലും ശോഭനമായ വഴിയാണ് അവര്‍ക്കു മുന്നിലുള്ളത്. അത് അവര്‍ക്കും ലോകത്തിനും മികച്ച ദിവസമായിരിക്കും. '
കിം, ട്രംപ് കൂടിക്കാഴ്ച അടുത്ത മാസമോ ജൂണിലോ നടക്കുമെന്നാണു പ്രതീക്ഷിക്കപ്പെടുന്നത്. ഉ.കൊറിയന്‍ തലസ്ഥാനമായ പ്യോങ്‌യാങ്ങിലോ ഉ.കൊറിയയ്ക്കും ദ.കൊറിയയ്ക്കുമിടയിലുള്ള സൈനികരഹിത മേഖലയിലോ ആയിരിക്കും ചരിത്രപരമായ കൂടിക്കാഴ്ച നടക്കുകയെന്നാണു കരുതപ്പെടുന്നത്. സ്റ്റോക്ക്‌ഹോം, ജനീവ, ബാങ്കോക്ക്, സിംഗപ്പൂര്‍ എന്നിവിടങ്ങളും പരിഗണിക്കപ്പെടുന്നുണ്ട്.
ദ.കൊറിയന്‍ പ്രസിഡന്റ് മൂണ്‍ ജെ. ഇന്നും കിം ജോങ് ഉന്നുമായുമുള്ള കൊറിയന്‍ ഉച്ചകോടി അടുത്തയാഴ്ച നടക്കാനിരിക്കുകയാണ്. ഏപ്രില്‍ 29നാണ് കൊറിയകള്‍ക്കിടയിലുള്ള സൈനികരഹിത പ്രദേശത്ത് നിര്‍ണായകമായ കൂടിക്കാഴ്ച നടക്കുന്നത്. പരിപാടിക്കുള്ള എല്ലാ ഒരുക്കങ്ങളും പൂര്‍ത്തിയായതായി മൂണ്‍ ജെ. ഇന്‍ അറിയിച്ചു. സമ്പൂര്‍ണ ആണവ നിരായുധീകരണത്തിന് ഇരുരാജ്യങ്ങളും എല്ലാ അര്‍ഥത്തിലും സന്നദ്ധമായതായും മികച്ച സങ്കല്‍പങ്ങളും ക്രിയാത്മകമായ പരിഹാരങ്ങളുമാണു മുന്നോട്ടു വേണ്ടതെന്നും അദ്ദേഹം കൂട്ടിച്ചേര്‍ത്തു.