തിരുവനന്തപുരം: വന്‍ സാമ്പത്തിക ബാധ്യതയില്‍പെട്ടുഴലുന്ന സംസ്ഥാന വൈദ്യുതി ബോര്‍ഡിന് വാട്ടര്‍ അതോറിറ്റി നല്‍കാനുള്ള വന്‍ തുകയുടെ കുടിശ്ശിക സര്‍ക്കാര്‍ നല്‍കുന്നതിനുള്ള വഴിയൊരുങ്ങുന്നു. വാട്ടര്‍ അതോറിറ്റിയില്‍ നിന്ന് ഉള്‍പ്പെടെ 1400 കോടി രൂപ വൈദ്യുതി ബോര്‍ഡിന് ലഭിക്കാനുണ്ട്. വാട്ടര്‍ അതോറിറ്റിക്ക് വിവിധ സര്‍ക്കാര്‍ വകുപ്പുകളില്‍നിന്നും പൊതുമേഖലാ സ്ഥാപനങ്ങളില്‍ നിന്നും വന്‍തുക കുടിശ്ശികയായി ലഭിക്കാനുമുണ്ട്.
വാട്ടര്‍ അതോറിറ്റിയും വന്‍ സാമ്പത്തിക പ്രതിസന്ധിയിലൂടെയാണ് കടന്നുപോകുന്നത്. ഈ തുക കണക്കാക്കി നല്‍കുന്നതിനു പകരം വൈദ്യുതി ബോര്‍ഡിന് സര്‍ക്കാര്‍ നല്‍കുന്നതിലേക്കാണ് തീരുമാനം. ചീഫ് സെക്രട്ടറിയുടെ നേതൃത്വത്തില്‍ ചേര്‍ന്ന ഉന്നതതല യോഗത്തില്‍ ഇക്കാര്യത്തില്‍ ധാരണയായിട്ടുണ്ട്.
ഇപ്പോഴുള്ള കുടിശ്ശിക കെ.എസ്.ഇ.ബിക്ക് നല്‍കിക്കഴിഞ്ഞാല്‍ ഇനിയുള്ള ബില്ലുകള്‍ സമയബന്ധിതമായി അടച്ചുതീര്‍ക്കുന്നതിനുള്ള വഴി സര്‍ക്കാര്‍ ഒരുക്കുന്നുണ്ട്. അടുത്ത് ചേരുന്ന ഉന്നതതല യോഗത്തില്‍ ഇക്കാര്യങ്ങളില്‍ അന്തിമ തീരുമാനം ഉണ്ടാകുമെന്നറിയുന്നു.