ചങ്ങനാശേരി: മാടപ്പളളി മാമൂട്ടില്‍ വാടക വീട്ടില്‍ താമസിക്കുന്ന കുടുംബത്തിന്റെ 11 പവന്‍ സ്വര്‍ണ്ണം മോഷ്ടിച്ചു. മമ്മൂട് ഫോര്‍വേഡ് ലൈബ്രറിക്ക് സമീപം കാര്‍മല്‍ നഗറില്‍ ചമ്പക്കുളും വീട്ടില്‍ വാടകക്ക് താമസിക്കുന്ന ഉമാപറമ്പില്‍ തങ്കമ്മയുടെ വീട്ടിലാണ് മോഷണം നടന്നത്.
വ്യാഴാഴ്ച പുലര്‍ച്ചെ മൂന്നരയോടെയാണ് മോഷണ വിവരം അറിയുന്നതെന്ന് തങ്കമ്മ പോലീസിന് മൊഴി നല്‍കിയിട്ടുണ്ട്.അടുക്കള ഭാഗത്ത് വാതിലിലൂടെ അകത്തു കടന്ന മോഷ്ടാവ് അലമാരയില്‍ സൂക്ഷിയിരുന്ന ഏട്ടുപവന്റെ മാലയും ഉറങ്ങി കിടന്നിരുന്ന തങ്കമ്മയുടെ കഴുത്തിലുണ്ടായിരുന്ന മൂന്നു പവന്റെ മാലയും മോഷ്ടിച്ചെടുത്തതായാണ് കേസ്. പുലര്‍ച്ചേ എഴുന്നേറ്റപ്പോഴാണ് അടുക്കള വാതില്‍ തുറന്നു കിടക്കുന്നതും മോഷണ വിവരം അറിയുന്നതും.
ഉടന്‍ തന്നെ തൃക്കൊടിത്താനം പോലീസില്‍ വിവരം അറിയച്ചതിനെ തുടര്‍ന്ന് എസ് ഐ റിച്ചാര്‍ഡ് വര്‍ഗീസിന്റെ നേതൃത്വത്തില്‍ പോലീസെത്തി അന്വേഷണം നടത്തിയെങ്കിലും പ്രതിയെപറ്റി സൂചന ലഭിച്ചില്ല. പരാതിയില്‍ മേല്‍ കേസെടുത്ത പോലീസ് സമീപത്തെ വീടുകളിലെ സി സി ടി വി ദൃശ്യങ്ങള്‍ പരിശോധിക്കുമെന്ന് അന്വേഷണ ഉദ്യോഗസ്ഥര്‍ അറിയിച്ചു.
കഴിഞ്ഞ ദിവസവും ഈ ഭാഗത്ത് വെട്ടിത്താനത്ത് ആനിയമ്മയുടെ ഒന്നര പവന്റെ സ്വര്‍ണ്ണമാല അപഹരിച്ചിരുന്നു.