ആലക്കോട്: ഇന്റര്‍നെറ്റ് സംവിധാനം തകരാറിലായതോടെ ആലക്കോട് സബ്ട്രഷറി പ്രവര്‍ത്തനം അവതാളത്തിലായി. നാലുദിവസം മുമ്പാണ് ഇന്റര്‍നെറ്റ് തകരാറിലായത്. ബി.എസ്.എന്‍.എല്‍ ഉദ്യോഗസ്ഥര്‍ പരിശോധന നടത്തിയെങ്കിലും സാങ്കേതിക പിഴവ് പരിഹരിക്കപ്പെടാതെ കിടക്കുകയാണ്. സര്‍ക്കാര്‍ ഓഫിസുകളുടേതടക്കം പല ദൈന്യംദിന ഇടപാടുകള്‍ ഇതുകാരണം മുടങ്ങി. ട്രഷറി ജീവനക്കാര്‍ മേലുദ്യോഗസ്ഥരെ വിവരമറിയിച്ചിരുന്നെങ്കിലും ഇന്റര്‍നെറ്റ് സംവിധാനം പുനസ്ഥാപിക്കാന്‍ ബന്ധപ്പെട്ടവര്‍ തയാറായിട്ടില്ല. ട്രഷറികളിലെ സാങ്കേതിക തകരാറുകള്‍ പരിഹരിക്കേണ്ട ചുമതല കെല്‍ട്രോണാണെന്നിരിക്കെ അവരും കൈ മലര്‍ത്തുകയാണ്. ആവശ്യങ്ങള്‍ നടക്കാതെ വരുമ്പോള്‍ ജീവനക്കാരും ട്രഷറിയിലെത്തുന്നവരും തമ്മില്‍ വാക്കേറ്റം വരെ നടക്കുന്ന സ്ഥിതിയാണ്.