പനമരം: നൂറ്റാണ്ടുകളായി മുസ്‌ലിം സമൂഹം അനുഷ്ടിച്ച് വന്നിരുന്ന ഇസ്‌ലാമിന്റെ പൈതൃകത്തെ വളച്ചൊടിച്ച് രംഗപ്രവേശം ചെയ്ത ചില സംഘടനകളിന്ന് പൊതുസമൂഹത്തിനും രാജ്യത്തിനും ഭീഷണി സൃഷ്ടിക്കുന്ന രീതിയിലേക്ക് മാറിയിരിക്കുകയാണ്. ഈ സന്ദര്‍ഭത്തിലാണ് നൂറ്റാണ്ടുകള്‍ക്ക് മുന്‍പുള്ള ഇസ്‌ലാമിന്റെ പൈതൃകം അതേപടി അനുഷ്ടിച്ച് വരുന്ന സമസ്ത പൈതൃകത്തിലേക്ക് വിജയത്തിലേക്ക് എന്ന മുദ്രാവാക്യമുയര്‍ത്തി ആദര്‍ശ കാംപയിനുമായി രംഗത്തിറിങ്ങാന്‍ നിര്‍ബന്ധിതരായതെന്ന് എസ്.കെ.എസ്.എസ്.എഫ് സംസ്ഥാന ജനറല്‍ സെക്രട്ടറി സത്താര്‍ പന്തല്ലൂര്‍ പ്രസ്താവിച്ചു. സമസ്ത ജില്ലാ സമ്മേളനത്തിന്റെ സമാപന സമ്മേളനത്തില്‍ സമസ്തയും നവസമൂഹവും എന്ന വിഷയം അവതരിപ്പിച്ച് സംസാരിക്കുകയായിരുന്നു അദ്ദേഹം.
രാജ്യത്ത് സഹോദര മതസ്തരുമായി ഏറ്റവും നല്ല രീതിയില്‍ സാഹോദര്യം പുലര്‍ത്തിപ്പോന്നിരുന്ന മുസ്‌ലിം സമൂഹത്തിനിടയിലേക്ക് ചില സലഫീ പ്രസ്ഥാനങ്ങള്‍ സാഹോദര്യത്തില്‍ നിന്ന് വ്യതിചലിക്കുന്ന രീതിയിലുള്ള നടപടികളുമായി കടന്നുവരുന്നത്. ഇവര്‍ സമുദായത്തെ സഹോദര സമുദായങ്ങള്‍ക്കിടയില്‍ തെറ്റിദ്ധാരണ പരത്തുന്നതിന് കാരണക്കാരായി.
ഇത്തരത്തിലുള്ള പ്രവര്‍ത്തനങ്ങള്‍ ഇവര്‍ ആരംഭിച്ചതാണ് രാജ്യത്ത് ഇസ്‌ലാമിനെ ഇടിച്ചുകാണിക്കുന്നതിന് കാരണമായത്. ഇത്തരത്തിലുള്ള പ്രസ്ഥാനങ്ങളെ സമൂഹത്തിന് മുന്നില്‍ തുറന്ന് കാണിക്കേണ്ടത് അത്യാവശ്യമായി മാറിയിരിക്കുകയാണ്.
പ്രവാചകനും അനുയായികളും ഇസ് ലാമിനെ പ്രചരിപ്പിച്ചതിന്റെ അതേപാത പിന്‍പറ്റിയാണ് സമസ്തയുടെ സൂഫീവര്യന്‍മാര്‍ പിന്തുടരുന്നത്. എന്നാല്‍ മറ്റ് സംഘടനകള്‍ അത്തരത്തിലുള്ള പാതയല്ല പിന്‍പറ്റിയത്. അവര്‍ മറ്റ് മതസ്തരെ ക്ഷണിച്ചുവരുത്തി വാദപ്രതിവാദങ്ങള്‍ നടത്തിയാണ് ഇസ് ലാമിന്റെ പ്രാചാരണമാണ് നടത്തിയത്.
ഇത് മറ്റു മതസ്തരെ ഇകഴ്ത്തിക്കാണിക്കുന്ന തരത്തിലുള്ളതാണെന്നും ഇത്തരം പ്രവണതകള്‍ ഇസ്‌ലാം ഒരിക്കലും അംഗീകരിക്കുന്നില്ല. ഇത്തരത്തില്‍ ഇസ് ലാമിന്റെ പൈതൃകത്തെ വളച്ചൊടിക്കുകയാണ് സലഫികള്‍ ചെയ്യുന്നതെന്നും അദ്ദേഹം ആരോപിച്ചു.