പട്ടാമ്പി: മേലെ പട്ടാമ്പിയില്‍ ഇന്ന് പുലര്‍ച്ചെ ഉണ്ടായ വാഹനാപകടത്തില്‍ മൂന്ന് പേര്‍ മരിച്ചു. പാലുര്‍ മൂളത്തിന്‍ വീട്ടില്‍ സുല്‍ത്താന്‍ (21), പേങ്ങാട്ടിരി സ്വദേശി സുഹ്‌റ (52), ഇവരുടെ മകന്‍ അജ്മല്‍ (25) എന്നിവരാണ് മരിച്ചത്.

രണ്ടുപേര്‍ ഗുരുതര പരുക്കുകളോടെ പെരിന്തല്‍മണ്ണയിലെ സ്വകാര്യ ആശുപത്രിയില്‍ ചികിത്സയിലാണ്. പേരാമ്പ്രയില്‍ ലോഡിറക്കി ബംഗളൂരിലേക്ക് മടങ്ങുകയായിരുന്ന ലോറിക്ക് പിന്നില്‍ ഇവര്‍ സഞ്ചരിച്ചിരുന്ന കാര്‍ ഇടിക്കുകയായിരുന്നു. ഇന്ന് പുലര്‍ച്ചെ രണ്ട് മണിക്കാണ് അപകടം.

കൊച്ചിയിലെ ലുലുമാള്‍ സന്ദര്‍ശിച്ച് മടങ്ങുകയായിരുന്ന കുടുംബമാണ് അപകടത്തില്‍ പെട്ടത്. ലോറിക്കിടയില്‍ കുടുങ്ങിയ കാറില്‍ നിന്ന് ഏറെ ശ്രമകരമായാണ് ആളുകളെ പുറത്തെടുത്ത് ആശുപത്രിയില്‍ എത്തിച്ചത്.