തളിപ്പറമ്പ്: മിനി സിവില്‍സ്റ്റേഷനിലെ ജോ. ആര്‍.ടി.ഒ ഓഫിസില്‍ ലേണിങ് ടെസ്റ്റിനെത്തിയ 150 പേരെ മണിക്കൂറുകളോളം നിര്‍ത്തിയ ശേഷം തിരിച്ചയച്ചത് അപേക്ഷകരെ രോഷാകുലരാക്കി. ഇന്നലെ രാവിലെ പത്തോടെയായിരുന്നു സംഭവം. ചെറുപുഴ, ആലക്കോട്, ശ്രീകണ്ഠപുരം, പയ്യന്നൂര്‍ പ്രദേശങ്ങളില്‍ നിന്നുള്ള അപേക്ഷകര്‍ രാവിലെ അഞ്ചോടെ തന്നെ എത്തി ക്യൂ നിന്നിരുന്നു. സ്ത്രീകളായിരുന്നു കൂടുതലും. മണി പത്തായിട്ടും ടെസ്റ്റ് നടത്താത്തതിനെതുടര്‍ന്ന് അന്വേഷിച്ചപ്പോഴാണ് ടെസ്റ്റ് ഇല്ലെന്ന വിവരം ജീവനക്കാര്‍ അറിയിച്ചത്. ടെസ്റ്റ് നടത്തേണ്ട ഉദ്യോഗസ്ഥന്‍ ലീവാണെന്നും ജോ. ആര്‍.ടി.ഒ തളിപ്പറമ്പ് താലൂക്ക് ഓഫിസില്‍ അദാലത്തില്‍ പങ്കെടുക്കേണ്ടതിനാല്‍ ടെസ്റ്റ് നടത്താന്‍ പറ്റില്ലെന്നും എല്ലാവരും തിങ്കളാഴ്ച വന്നാല്‍ മതിയെന്നുമാണ് ജീവനക്കാര്‍ പറഞ്ഞത്. ഇതോടെ രാവിലെ മുതല്‍ ഭക്ഷണം പോലും കഴിക്കാതെ ക്യൂവില്‍ നിന്ന അപേക്ഷകര്‍ രോഷാകുലരായി. ഡ്രൈവിങ് സ്‌കൂള്‍ നടത്തിപ്പുകാര്‍ ഇടപെട്ട് ഇവരെ സമാധാനിപ്പിക്കാന്‍ ശ്രമിച്ചെങ്കിലും ആരും തിരിച്ചുപോകാന്‍ തയാറായില്ല. രാവിലെ 11ന് അദാലത്തിനെത്തിയ കലക്ടറെ നേരില്‍ കണ്ട് പരാതിപ്പെട്ടതിനെതുടര്‍ന്ന് കലക്ടര്‍ അദാലത്തില്‍ പങ്കെടുത്തുകൊണ്ടിരുന്ന ജോ. ആര്‍.ടി.ഒ ഇ.എസ് ഉണ്ണികൃഷ്ണനെ ഓഫിസിലേക്ക് തിരിച്ചയച്ച് പ്രശ്‌നം പരിഹരിക്കാന്‍ നിര്‍ദേശിക്കുകയായിരുന്നു. ജോ. ആര്‍.ടി.ഒ തിരികെ ഓഫിസിലെത്തിയാണ് നിര്‍ത്തിവച്ച ലേണിങ് ടെസ്റ്റ് പൂര്‍ത്തീകരിച്ചത്.