ആലക്കോട്: ശക്തമായ കാറ്റിലും മഴയിലും മലയോര മേഖലയില്‍ വ്യാപക നാശനഷ്ടം. ഇന്നലെ ഉച്ചയ്ക്ക് രണ്ടോടെയുണ്ടായ ശക്തമായ വേനല്‍ മഴയാണ് നാശം വിതച്ചത്. കരുവന്‍ചാല്‍, വെള്ളാട്, വായാട്ടുപറമ്പ, താവുകുന്ന് മേഖലകളിലാണ് കൂടുതല്‍ നാശം. താവുകുന്നിലെ ജോയ് മുരിയംവേലില്‍, മേരി പുല്ലംകുന്നേല്‍, സിബി പടിഞ്ഞാറെ പള്ളിത്തറ, ബീന വിജയന്‍ എന്നിവരുടെ വീടുകള്‍ തകര്‍ന്നു. ജസ്റ്റിന്‍ കവളക്കാട്ട്, സാബു പള്ളിത്തറ, ടോമി കുളംകുത്തി, സാബു കുളംകുത്തി എന്നിവരുടെ നൂറോളം റബറും വാഴയും നശിച്ചു. വൈദ്യുതി ലൈനുകള്‍ക്ക് മുകളില്‍ മരങ്ങള്‍ വീണതിനാല്‍ മലയോര മേഖലയിലെ വൈദ്യുതി ബന്ധം തകരാറിലായി. നൂറുകണക്കിന് റബര്‍ മരങ്ങളും തെങ്ങും കവുങ്ങും വാഴയും നിലംപൊത്തി. പലയിടത്തും റോഡിലേക്ക് മരം വീണ് ഗതാഗതം തടസപ്പെട്ടു. ലക്ഷങ്ങളുടെ നഷ്ടമാണ് പല മേഖലകളിലും ഉണ്ടായത്.